* * *

Кӧні шаня асьтӧ кылан,

Сэні-й вӧчан поз.

Медся лӧсьыд Эжва йылын

Овны бать-мам моз.

Ичӧтдырсянь песла-вала

Судзсьыны кӧть кор,

Шыасьлыны йӧлӧгалы,

Лэбавны рытсёр.

Югыд вежӧр юрӧ сюйны,

Сьӧлӧмӧ — пӧсь лов.

Кодлыкӧ да ёртӧ туйны,

Юкны нянь да сов.

Чужан кывйӧн гӧлӧс сетны

Пос помын кӧть кӧн.

Аслад ордым вылӧ петны

Аслад воськолӧн.

Ачым важӧнкодь нин шулі:

«Тані — коми би!»

Кытчӧдз колам чужан мулы,

Сэтчӧдз олам ми.