МЕНАМ ЧУЖАНІНЫН

Менам чужанінын, кӧні ола-выла,

Кӧні медся гора варовитӧ гым,

Пӧкрӧласьӧм бӧрын кӧдзыд эрдъяс вылӧ

Морӧспаньӧдз усьӧ еджыд-еджыд лым.

Менам чужанінын, кӧні ола-выла,

Кӧні вӧрса ёльыс бадьяс костын сюсь,

Лӧсьыдысла бӧрдӧ, лӧсьыдысла сьылӧ

Польдӧм юяс весьтын еджыд-еджыд юсь.

Менам чужанінын, кӧні ола-выла,

Кӧні синмӧ пырӧ сьӧлӧм шонтысь рӧм,

Небыд лёддзӧн водӧ потшӧс-майӧг вылӧ

Дзоридзалӧм бӧрын еджыд-еджыд льӧм.

Менам чужанінын, кӧні ола-выла,

Кӧні меным гажтӧм некор на эз вӧв,

Сиктсянь бура ылын небыд турун вылын

Визув бокын йирсьӧ еджыд-еджыд вӧв.

Менам чужанінын, кӧні ола-выла,

Кӧні нэмсӧ кылӧ гажа сьыланкыв,

Петӧ кильчӧ вылӧ тувсов тӧвъяс йылӧ

Сьӧлӧм пыдзыртӧдысь мича-мича ныв.