* * *

Мортлы колӧ овны чужанінас,

Кӧні синъяс водзын яг да рас,

Кӧні батьяс ошйысьӧны пинас,

Кӧні век на ловъя рӧдвуж пас.

Мортлы колӧ овны чужанінас,

Кӧні муса весиг йиа пуж,

Кӧні мамыд вурӧ сьӧлӧм дінас,

Да кын лолӧн овнысӧ он куж.

Мортлы колӧ овны чужанінас,

Кӧні юргӧ гажа сьыланкыв,

Кӧні тулыс оз и ӧшйыв инас,

Да лӧз войын бобуласьӧ ныв.

Мортлы колӧ овны чужанінас,

Кӧні чӧскыд вӧлі нёнь да сюр,

Кӧні кага медся ыджыд чина,

Да кӧн аслад кывйыд медся бур.