* * *

Вӧрзьӧ нин пӧткаыс, нюрсаыс,

Колясны дозмӧр да тар.

Дасаӧс, сёаӧс, сюрсаӧс

Лунтыр мен чилйӧдлӧ ар.

Вӧлисти озырма, тыдалӧ,

Ёна и завидьтас сикт.

Та мында сьӧмыд ӧд лыдалӧн,

Гашкӧ-и, ӧтнамлӧн дзик.

Сӧмын ӧд, веськыда висьтала,

Нинӧмыс меным оз ков.

Тадзи кор вӧрӧдзыс письтыла,

Сійӧ на-й кыпӧдӧ лов.

Чӧскыда сёйны эг велавлы,

Тшыгъявлі эг ли, ог тӧд.

Пармаас мыйясла келавла,

Сійӧн и кызвыннас пӧт.

Паськӧмӧй — енэжлӧн дӧрӧмыс,

Вольпасьӧй — виддзыслӧн воль.

Шебрасӧй — кыалӧн шӧрӧмыс,

Юрлӧсӧй — шонділӧн моль.

Олӧмыс дзикӧдз кӧ вижӧдас,

Кывбурлы тетрадь оз ло,

Енэжсӧ чышка да гижа дай,

Пӧгибӧ некор ог во.