ГАБӦ

Деревняным рочӧн — Габов,

Комиӧн кӧ — Габӧ сикт.

Ыджыд карта вылад абу,

Перым мукӧд орччӧн дзик.

Кытысь воліс Габӧ айыс,

Кутшӧм вӧлі, морт оз тӧд.

Ёна важӧн вӧлі тайӧ,

Вӧлі олӧмыс дзик мӧд.

Визув юлӧн йылӧдз катіс,

Кӧн эз вӧв на чер ни тув.

Сӧмын йӧра ветліс таті,

Сӧмын чукчи чегис ув.

Юын чери быдсӧн пуис,

Вӧрын вотӧс вӧлі тыр.

«Татчӧ-й пукся», — мортыд шуис,

Бӧрйис нӧрыс, бертіс мыр.

Пуктіс керка лунӧ банӧн,

Кӧні чужис ныв и пи.

Тадзи-й пуксис олӧм тані,

Тадзи-й лоим тані ми.

Бура вӧчны, уна тӧдны

Нэмсӧ зілис миян морт.

Ыджыд лола Габӧ рӧдным

Мед на-й олас тані горт.

Со и ме тай бӧр жӧ вои,

Кӧть и бокын олі дыр.

Дзик жӧ Габӧыс кодь лои,

Тӧда вӧр да берта мыр.

Олӧм сьӧкыд, вира доя,

Но ас йӧзкӧд луныс шань.

Ловъя ванас парма койӧ,

Ловъя синнас чуткӧ ань.

Гашкӧ, этша нин ме олысь,

Но ӧд томуловыс эм.

Бурсӧ налы сета лолысь,

Медым гажӧдісны нэм.

Кыдз ме чайта, тайӧ нэмыс

Оз нин йирӧд кач ли гар.

Век на миян чери эмышт,

Век на эмышт сьӧла-тар.

Тыра пызан сӧмын тані,

Сӧмын тані бордъя лов.

Дзебӧй тані «Шондібанӧн»,

Сэсся нинӧмыс оз ков.