ЭЖВА ЙЫЛЫН

Эжва йылын ола-выла,

Сійӧ менам чужан му.

Тані уджала и сьыла,

Водзӧ кута коми ру.

Аддза: сиктӧй тадз жӧ олӧ,

Уджӧн шедтӧ нянь да сов.

Кызвын йӧзыс бордъя лола,

Дышсӧ песӧмӧн оз ов.

Керка кыптӧ сэн и тані,

Ставыс ыджыд, абу чом.

Эжва йывлӧн чужӧмбаныс

Мича нывлӧн кодь на том.

Кага, енсыкӧдӧн, чужӧ,

Тані дзу и сэні дзу.

Лӧсьыда на овны кужӧ

Менам дона чужан му.

Шудсӧ саридз сиа сылы,

Сиа сылы помтӧм нэм.

Менам муса Эжва йылӧй

Мирын ӧти дзик и эм.