ПӦЛЬЛӦН ДА БАТЬЛӦН МУ

Тані гожӧмнас номйыс виӧ,

Но ог эновт ас чужан му.

Шу тэ, Рӧдина, менӧ пиӧн,

Еджыд кыдзьяслӧн вокӧн шу.

Тӧда: гажаджык эськӧ карад,

Но мен мусаджык коми сикт.

Ог ме некытчӧ татысь, бара,

Бокӧ мӧдӧдчы некор дзик.

Менӧ быдтӧма зарни шептас

Небыд тӧв улын джуджыд сю.

Кыдз нӧ сьӧлӧмӧй менам лэптас

Кольны пӧльлысь да батьлысь му?

Лэччы, шондіӧй, менам киӧ,

Лӧзӧд синъясӧс, Эжва ю!

Шу тэ, Рӧдина, менӧ пиӧн,

Еджыд кыдзьяслӧн вокӧн шу.