КЫНӦМ ВИСЬӦМ ГЫРЫСЬ ЙӦЗЛӦН

Кынӧм висьӧмысь ӧти лекарствоӧн, сёян вежтӧг, бурдны он вермы. Быд висьысьлы колӧ тӧдӧдны, кутшӧм сёян сылы оз лӧсяв, сэтшӧм сёянсӧ оз и ков сёйны. Лӧсявтӧм сёян сёйӧм бӧрын висьӧм сьӧктӧдӧ морӧс увті, сьӧлӧм сотӧ, горзьӧдлӧ, восӧдӧ.

Шуам, висьысьӧс кӧ сьӧктӧдӧ сыла сёян бӧрын, — оз ков сылы сылаӧс сёйны, видзчысьны ёна кӧнтусь выйысь. Висьысь кӧ казялас шома торйысь лӧсьыдтӧм, оз кӧв сёйны шома капуста, вотӧс, яблӧг, юны ырӧш. Мед ёна колӧ висьысьлы видзчысьны винаысь, лукйысь-кушманысь, кренысь, горчицаысь, куритчӧмысь.

Сёйны колӧ кокньыдиктор, пӧткӧстор, пуӧм йӧв, йӧлӧн пуӧм кизьӧриник рок, зӧр шыдӧса рок йӧв вылын жӧ, небыда пуӧм кольк, яй. Гырк йӧртігӧн бур шома йӧв либӧ шузьӧдӧм (шом) йӧв. Пызя сёян: нянь, сук рок, картупель колӧ сёйны этшаджык.

Пӧсь нянь, небыд нянь, бура пӧжассьытӧм нянь оз ков сёйны. Кынӧмӧн висьысьлы нянь колӧ пӧжавны бурджыка, рӧшкыдджыка, косьтыны сійӧс. Сёйны йӧв пытшкын, тшай пытшкын, либӧ вӧлӧга пытшкын кӧтӧдӧмӧн.

Вывті ёна ӧтпырйӧн сёйӧмысь колӧ видзчысьны. Унджыкысь этшаникӧн сёйны кӧ, кокниджык лоӧ кынӧмыдлы.

Оз ков сёйны вывті кӧдзыдӧс ни вывті пӧсьӧс.

Оз ков сёйны тэрмасьӧмӧн, ӧдйӧн. Быд сёян колӧ бура курччавны ньылышттӧдз войдӧр.

Сёйӧм бӧрын час-мӧд оз кӧв уджавны сьӧкыд удж.

Коді сёяс тадзи висьталӧм серти, сылы лекарство шаня лӧсялас. Коді ас ногыс олас, сылы лекарствоыд этша нин отсалас.