* * *

Коркӧ волӧй вай Эжва йылӧ,

Волӧй ме ордӧ, лоа рад.

Оз ӧд кушӧн ло пызан вылӧй,

Ми ӧд аддзам на тӧлк и лад.

Волӧй, видзӧдлӧй Эжва юӧс,

Кузь покосъяса паськыд видз.

Волӧй, петкӧдла чужан муӧс,

Сылӧн шензьӧдас гаж и мич.

Ёна шаньӧсь ӧд тані йӧзыс,

Зэв ӧд небыдик налӧн кыв.

Зэв ӧд сӧстӧм тан енэж лӧзыс,

Зэв ӧд кыпыд тан сьыланкыв.

Волӧй, нинӧмӧн ті он ворссьӧй,

Эн на аддзылӧй татшӧм му.

И он аддзӧй, кӧть мыйта корсьӧй —

Ме ог ошйысьӧм ради шу.