ТУРУН ПУКТӦМ

„Видзӧдлан ыб вылӧ — чумали сярвидзӧ тыр...

Мӧдарӧ, видз вылӧ — зорӧдыс кымын!..“

Кытысь тіян турунтӧ пуктӧны (кутшӧм ю дорысь, шор дорысь, ты дорысь, нюр вылысь-ӧ, кытысь)?

Кутшӧм видз вылын медбур туруныд? Мыйла? Кутшӧм сикас турун сэні быдмӧ (кутшӧм нима)? Уна-ӧ став туруныс лолӧ тіян (кымын додь, либӧ юр; сьӧкта мераӧн кӧ, кымын килограмм, либӧ тонна, лоӧ сійӧ)? Уна-ӧ косӧд видз выв турун? Уна-ӧ нюр выв турун? Уна-ӧ рас выв турун? Уна-ӧ ю берд турун? (Додь лыд сертиыс вӧчӧй диаграмма турун юр рисуйтӧмӧн).

Школасянь экскурсияӧн видзьяс вылӧ ветлігӧн приметиталӧй: кӧні медбур туруныс быдмӧ? (Ва босьтланінын-ӧ, косӧдінын-ӧ. Мыйла?).

Мыйла ва босьтлытӧм вылын шоча туруныс быдмӧ дай чорыд? Кодӧс скӧт ёнджыка сёйӧ? Мый оз судзсьы кос видзлы?

Кыдзи позьӧ бурмӧдны чорзьӧм, нитшсялӧм видзьяс? (Корсьӧй газетъясысь да журнал „Ордым“-ысь сы йылысь гижӧдъяс).

Кутшӧм му-видз уджалан машинаяс эмӧсь тіянладорын? Эм-абу видз-му уджалысь чукӧр тіян грездын (сельскокӧзяйственнӧй артель)?

Кӧдзӧны-ӧ тіян турун? Кытчӧ (му вылӧ али видз вылӧ)?

Кытчӧ вӧчӧны видз (сьӧрт, оль, ковтыс, нюр, рас)?

Кутшӧм местаяс сэтшӧм нимъяснас шусьӧны?

__________

Гижалӧй быдлунся пасйӧданыд скӧт сёян турун нимъяссӧ комиӧн и рочӧн.

Чукӧртӧй гербарияныд став сикас турунсӧ: скӧт сёянсӧ и скӧт сёйтӧмсӧ.

Рисуйтӧй план вылӧ став гырысь юяссӧ и ю вожъяссӧ Коми обласьтлысь. Пасъялӧй, кутшӧм юяс пӧлӧн медбур видзьясыс. Мыйла бурӧсь? (Паськыд уйтыс ю пӧлӧныс ёна ойдлывлӧ, ёна няйталӧ-вынсьӧдӧ).