ПУКТЫСИГӦН

Батьӧ Ёгоркӧд водз летчисны видз вылӧ ытшкыны. Мамӧ кольччис пӧжасьны.

— Вай лэччам жӧ, Гришук, зорӧд талявны! — пӧжасьӧм бӧрын шуӧ меным мамӧ.

Тэчис наберушкаӧ пӧсь нянь, босьтіс туисӧн шомйӧв, меным сетіс ырӧш туис, лэччим видз вылӧ.

Батьӧ Ёгоркӧд лысва вылас вель уна ытшкӧмаӧсь. Миян локтӧдз тӧрытъя вӧвдӧмсӧ куртны нин заводитӧмаӧсь.

— Но, Гришукыд тшӧтш куртныд локтӧма...

Сёйыштӧм бӧрын ставӧн пондім куртны. Ме медводзын муна, ме бӧрся Ёгор, сэсся мамӧ, батьӧ лёдзсӧ топӧдӧ. Куртсьӧм бӧрын батьӧ мекӧд, а мамӧ Ёгоркӧд пондім юрасьны. Сэсся батьӧ пондіс лӧсьӧдны зорӧд йӧр, зорӧд пиньяссӧ выльысь сутшкаліс. Мамӧ Ёгоркӧд кутісны юръяссӧ ваявны.

Ассьыс джуджыдджыка зорӧдсӧ чӧвтӧм бӧрын батьӧ шуӧ меным:

— Вай жӧ, Гришук, кай зорӧд вылас.

Меным зэв окота зорӧдсӧ талявны. Эг ӧмӧй ӧдйӧ кутчысь зорӧд пиняд да каттьысь зорӧд вылад? Кытчӧ батьӧ турун пластсӧ лэптас, ме сэтчӧ и сувта, мед пластыс бӧр оз исковт. Кор зорӧдыс джуджыд лои, ме эг кут батьӧлы тыдавны да, пластсӧ ме вылӧ лэптылас. Дзикӧдз туруннас тырла, дӧрӧм улӧ и, вомӧ и туруныс пырас, этша и сьӧлася.

Чӧвтӧм бӧрын пажнайтім, сэсся батьӧяс бара ытшкыны босьтчисны.

— Ме, батьӧ, тшӧтш ытшкышта, — вӧзйыся ме.

— Коктӧ керыштан.

— Ог, ог!..

— Но, ытшкы, сэтшӧм кӧ окота. То тай Ёгорлӧн эм мӧд коса.

Батьӧ лэчталіс ичӧтик коса да сетіс меным. Шенышті ме ӧтпыр да, косаӧй сутшкысис муас.

— Вылӧджык коса йывсӧ кут!..

Мӧдысь шенышті — турунас косаӧй эз инмыв.

Ёгор видзӧдӧ да ваксьӧ.

— А тэ нӧ эськӧ кутшӧм вӧлін? Вунӧдін нин ассьыд ытшкыны велӧдчӧмтӧ? Час ӧд, Гришукыд быдмыштас да, оз на понды сетчыны тэныд ытшкӧмсьыд.

__________

Гиж, мыйяс тэ вӧчлін гожӧмнас.

Рисуйт ассьыд уджалӧмтӧ.