НЯНЬ ПЕРЙӦМ

Тулыскӧд тшӧтш садьмӧны, шызьӧны крестьяна. Тулыс налы вайӧ уна пӧлӧс удж. Лӧсьӧдӧны видз-му уджалан кӧлуй, мунӧны тувсавны-пуръясьны, пес кералӧны. Сю эськӧ и кӧдзӧма арын, а тулысын колӧ унатор на кӧдзны-пуктыны.

Быд ӧшинь улын, сод помын пуӧ удж йӧзлӧн. Пондісны гӧрны-кӧдзны. Муяс ловзисны, гӧгӧр йӧз, быдлаын кылӧ сёрни, горзӧм, вӧв вӧтлӧм шыяс. Шабді-пыш кӧдзӧм бӧрын кутчысьӧны картупель бердӧ да мукӧд град выв пуктасӧ. Быдтор ӧд со колӧ кузь тӧв кежлад лӧсьӧдны: капустаыд, кушманыд, галаныд, лукйыд, морковыд, ӧгурчиыд. Медбӧрын нин кӧдзӧны сёркни, купальнича лун бӧрын. Тадзи со тулысбыд крестьянин мырсьӧ, оз пуксьыв инас: ӧти удж эштас, мӧд нин талялӧма.

Шонді петігас крестьянин мунӧ удж вылӧ, лэччигас локтӧ. Муртса сьӧд войсӧ шойччӧ. Сідзи оз и тӧдлы крестьянин гожӧмлысь воӧм, колӧ куран-коса дінӧ кутчысьны. Турун пуктӧм миян комилӧн вывті сьӧкыд удж: кымыныськӧ ковмас копыртчывны да косанад шеныштны. Турунтӧ пуктігкості на и няньыд воас, тэрмӧдлӧ чарлаӧ кутчысьны.

Ёна и лоӧ мырсьыны. Уна пӧсь кисьтасны видз-му уджалысьяс няньтӧ йӧртӧдад пуктытӧдз. Воысь воӧ тадзи водз тулыссянь да сёр арӧдз удж оз помасьлы. Ӧти удж эштас, мӧд нин сюрӧма. Гӧрӧны, кӧдзӧны, куйӧд петкӧдӧны. Быд уджлысь колӧ тӧдны кад. Сёрмыштан кӧ, няньтӧм колян.

Оз кокньыда шед видз-му уджалысьлы турун-няньыд. Тӧв и гожӧм сы помысь лоӧ овны. Топыда кутӧ крестьянинӧс му ас бердас, оз лэдз ветлӧдлыны ӧтилаысь мӧдлаӧ. Он видз-мутӧ сьӧрад новлӧдлы. Босьтӧмыд кӧ видз-му, и пукав, уджав. Ветлӧдлыны кӧ кутан, оз на зэв муыд и верд. Видз-му уджалысь велалӧма аслас удж помысь, аслас му помысь овны. Пӧльясыс сідзи жӧ овлӧмаӧсь: му помысь. Быдлаын видз-му уджалысьяс нэмысянь овлӧмаӧсь ӧтилаын.

______________

Висьталӧй, кутшӧм удж помысь олӧны тіян вӧлӧсьтын? Тіян бать-мам? Кыдзи уджалӧны: важ ног-ӧ, выль ног? Кодлӧн тырмӧ няньыд? Кодлӧн оз? Кытчӧдз тырмӧ? Мыйла заводӧ ветлысьяслӧн няньыс пыр этшаджык воӧ?