МЫЙЛА МИЯНЛЫ КОЛӦ АРМИЯ

„Крестьяналы — му, рабочӧйяслы — пабрик-заводъяс, ставмувывса олысьяслы — мир!“

Татшӧм кывъяс шуисны коммунистъяс-большевикъяс 1917 вося Октябрын. Тайӧ кывъяс серти лӧсьӧдӧма Сӧвет Республикаяс Союзлӧн законпуктасыс.

Збыль — му лои крестьяна киын. Пабрик-заводъяс вылын ыджыдыс лои рабочӧй. Став гырысь пабрикъяс, заводъяс, рудникъяс, кӧрт туйяс лоины рабочӧй-крестьяна государстволӧн. Став уджсӧ нуӧдӧны рабочӧйӧн да крестьянаӧн бӧрйӧм Сӧветъяс.

Но а кор нӧ лоӧ ставмувывса олысьясыслы мирыс? Кор войнаяслы помыс воас?

Вот сійӧ миян абу на.

Мыйла нӧ эськӧ сӧвет власьтыс сё сюрсъясӧн йӧзсӧ уджалігкостіныс босьтӧ да видзӧ казармаын?

Сы вӧсна, мый муыд крестьяна ордын, пабрик-заводыд рабочӧйяс ордын, став власьтыс рабочӧй-крестьяна киын. Сійӧ зэв абу муса помещикъяслы да капиталистъяслы. Найӧ став выннысӧ пуктылісны бӧр важ оланногсӧ лӧсьӧдӧм понда. Налӧн вынныс вӧлі этша да, тӧлысь-мӧдӧн Гӧрд Гвардия пусь-пасьвартіс генералъяслысь бандаяснысӧ. Сэки локтісны налы отсасьны заграницаса капиталистъяс.

Налы нӧ мый колӧ? — Налы россияса рабочӧй-крестьянаӧн вӧчӧм революцияыс уна убытка жӧ вайис. Россияад уна пабрик, завод, рудник вӧлі заграницаса капиталистъяслӧн. Уна помещикъяслӧн муыс вӧлі закладуйтӧма заграницаса банкъясын. Бура уна сьӧм заграницаса капиталистъяс удждылісны сар правительстволы да буржуйяс правительстволы. Войнаӧдз уджйӧзыс вӧлӧма 8 миллиард шайт кымын, да войнадырсяыс — 6 миллиард. Буржуйяс ставсӧ вӧлі кӧсйӧны миянлысь кульыштны 20 миллиард шайт дорысь унджык.

Сӧвет власьт дон мынтытӧг мырддис буржуйяслысь пабрик-заводъяссӧ, рудникъяссӧ, видз-мусӧ. Сӧвет власьт эз кӧсйысь вештыны заграницаса банкиръяслы сарлысь уджйӧзсӧ.

Заграницаса капиталистъясыдлы зептаныс инмис миян революцияыд. Сійӧн найӧ и бырӧдӧны сӧвет власьттӧ. Сэсся найӧ полӧны, мед эськӧ оз велӧдчыны миян ног вӧчны асланыс рабочӧйясныс да крестьянаыс.

Заграницаса капиталистъяс отсалісны еджыдъяслы сьӧмӧн, оружйӧӧн, паськӧмӧн, сёян-юанӧн, йӧзӧн. Найӧ мӧдӧдавлісны, дай ӧні на мӧдӧдавлӧны, миянӧ шпионъясӧс, мед найӧ жугласны кӧрт туйяс, соталасны складъяс, ылӧдласны йӧзӧс, кыпӧдаласны бунтъяс.

Миянлы колӧ казармаын олысь, велӧдчӧм армия, мед ми быд кадӧ вермам сувтны водзсасьны капиталистъяскӧд.

Сэсся колӧ велӧдны военнӧй службаӧ став уджалысьсӧ, сӧмын гортсьыс вӧрзьӧдлытӧг, мед уджсьыс оз манитчы. Сэки миян ичӧтик армия бердад чукӧрмас став выныс уджалысь йӧзлӧн. Сэки ми некутшӧм врагъясысь огӧ кутӧй повны.

__________

Коді нӧ врагыс уджалысьяслӧн? Вермас оз сӧвет власьт ӧні овны Гӧрд армиятӧг? Мый дорйӧ Гӧрд армия? Кор сӧвет государство пондас вермыны Гӧрд армиятӧг овны? Мый колӧ вӧчны сэтчӧдз мукӧд государствоясын?

Тшӧкты пӧльтӧ ли, батьтӧ ли, висьтавны, кыдзи сійӧ служитлӧма важ армияын.

Юась гӧрдармеечлысь, мыйӧ сійӧ велаліс Гӧрд армияас служитігӧн.

Дыр-ӧ важӧн служитлӧмаӧсь армияын? Дыр-ӧ ӧні служитӧны?