ВОЛХОВСТРОЙ

Сӧмын мойдысь ми кывлім багатыръяс йылысь. Мыйсӧ найӧ оз вермыны вӧчны?! Быдтор!

Сійӧ мойдын. А вот миян рабочӧйяс со мый вӧчӧны, да оз мойдын, а збыльысь!

Ленинград дорын эм Волхов нима ю. Сійӧ усьӧ Ладога тыӧ. Абу эськӧ кузь юыс, да коськӧсь, ветлыны сы кузя весиг оз позь. Швачкӧны валъясыс изйӧсь берегас. Мӧвпаліс уджалысь мортлӧн вежӧрыс босьтны юлысь вынсӧ да уджӧдны, мед выныс берег жуглӧм пыдди пӧльза пондіс вайны.

Сар дырйи на эськӧ вежӧра йӧз вӧлі думайтлӧны та йылысь, да сарыд мукӧдторйӧн вӧлі ноксьӧ, бур уджад пӧраыс эз вичмы, сьӧмыс эз судзсьы.

Революция бӧрын сӧвет власьт босьтчис тайӧ уджӧ. Шуис вӧчны Волховӧ зэв ыджыд станция, мед эськӧ сійӧ чукӧртіс юыслысь став вынсӧ да юкліс кыдзи колӧ.

Вӧчисны гидроэлектрическӧй станция.

Тайӧ станцияыс сетӧ электричество вын ленинградса пабрик-заводъяслы. Станциялӧн сетан выныс водзсасьӧ 80.000 вӧв вынлы. Пӧртан кӧ морт вынӧ, ковмис эськӧ 1.500.000 ён уджалысь морт. Абу ӧмӧй „багатыр“? 80.000 вӧв пыдди либӧ 1.500.000 морт пыдди — ӧти станция. Сійӧ станциясӧ вӧчисны сӧмын 3.000 морт.

Волхов станциясянь сетӧм электричество выннас бергӧдлӧны ленинградса пабрик-заводъяслысь машинаяссӧ, новлӧдлӧны трамвайяс, вешталӧны ӧти местаысь мӧдлаӧ уна сюрс тонна сьӧкта грузъяс, югдӧдӧны керка пытшкӧсъяс, уличаяс, — быд ногыс кокньӧдӧны мортлысь уджсӧ.