МЕДВОДДЗА КОНФЕРЕНЦИЯ УДАРНӦЙ БРИГАДАЯСЛӦН

Ударнӧй бригадаяс конференция вылӧ вӧрсянь, кер вӧчанінсянь, локтӧмаӧсь унджыкыс том йӧз. На пӧвстын уна том нывъяс.

Конференция вылын пукалысьяс ставныс зэв збыль чужӧмаӧсь, мӧвпалӧны, арталӧны асланыс удж йылысь, кывзӧны ёртъясыслысь висьталӧмъяссӧ. Быд ударник сёрнитӧ сьӧлӧмсьыс, чорыда.

Уна сёрнитісны социалистическӧй ордйысьӧм йылысь, вывті пӧ ми сы туйӧд ньӧжмыдӧсь, омӧля вӧрам. Социалистическӧй ордйысьӧм пӧ ёна колӧ паськӧдны, ӧдйӧ. Вежӧравны сы йылысь быдсӧнлы бура, мед ставныс тӧдасны ордйысьӧмыслысь могъяссӧ, колӧ став уджалысьсӧ кыскыны социалистическӧй ордйысьӧмас. Ударникъяслӧн пӧ мог: аддзавны уджысь нелючкияс да кадын бырӧдны найӧс, бурмӧдны уджсӧ. Корӧны восьтавны производственнӧй кружокъяс да лӧсьӧдны план — кутшӧм удж вылӧ кымын мортӧс ыстыны, сэні видлавны ударникъяслысь уджсӧ да вӧчӧмторъяс вылас велӧдчыны водзӧ уджавны.

Бригадникъяс чуксалісны мӧда-мӧдсӧ ударнӧй бригадаяссӧ пӧртны ударнӧй кварталъясӧ.