КЫАН ФАБРИКАӦ ЭКСКУРСИЯӦН ВОЛӦМ

(Детиналӧн висьталӧм)

Ӧтчыд ми ветлім экскурсияӧн кыан фабрикаӧ. Локтім ӧграда дорас. Ӧткаӧн миянӧс лэдзисны ӧграда пытшкас. Гӧгӧр сулалӧны джуджыд, куим судта гӧрд керкаяс. На дорын мусяньыс чургӧдчӧма зэв джуджыд труба. Сэті петӧ сьӧд тшын.

Пырим ӧти керкаӧ, кайим медвылыс судтаас. Видзӧдам да, машинаяс кватитасны хлопок тыра тюк, пусь-пасьвартасны. Лэччим улӧджык. Сэтчӧ небзьӧдӧм хлопокыд вылісьыс лэччӧ йиркас вӧчӧм розьӧд. Медулі судтаас машинаясыс хлопоксӧ весалӧны ёгсьыс, ниралӧны, зуалӧны укладысь вӧчӧм сынанӧн.

Гӧгӧр тырыс бус, весиг сьӧкыд лолавны. Вата торъясыс, лым моз, пуксьӧны вылад.

Мунім мӧд вежӧсӧ. Сэні машинаяс печкӧны шӧрт да гартӧны трубичаяс вылӧ. Водзысьджык аддзим шӧртсьыс матерйӧ кыӧм. Кыан машинаяслӧн чӧлнӧкыс лэбалӧ, висьталісны — быд минутын 150-ысь кытшовтӧ. Машинаяс уджалӧм зыкысла весиг сёрни он кыв. Сэсся ми видзӧдім матерйӧсӧ машинаӧн гартӧм да краситан вежӧсӧ нуӧм. Сэні машина краситігӧн вӧчалӧ мича серъяс.

Мудзтӧдз ми видзӧдім фабрикаын уджалӧмсӧ.