ЙӦЗ УДЖАЛӦНЫ ӦТВЫЛЫСЬ СТАВ ПОНДА

Часі — зэв колантор. Часітӧг овны ӧні сьӧкыд. Кута киын часі да мӧвпала: кымын морт бара мырсис та вылын...

Войдӧр чайтлі, мися этшаниклы ӧд кӧнкӧ лои мырсьыны, сэсся думышті: тыдалӧ, унаӧн уджавлӧмаӧсь.

Часіын эм кӧрт, ыргӧн, уклад, стеклӧ, изумруд кодь из да.

Ӧти сикас йӧз уджалісны кытӧнкӧ му пытшкын, перйисны кӧрт сім. Мӧд сикас — кӧрт туйӧн кыскалісны сійӧ сімсӧ заводӧ. Коймӧд сикас — заводын сімсӧ сывдӧмӧн вӧчисны кӧрт. Нёльӧд — сійӧ кӧртсьыс вӧчалісны часі вевтъяссӧ да мукӧд торъяссӧ.

Ставсӧ сійӧ уджалісны уна местаын.

Сідзи жӧ дырӧн кӧрт сімысь лоины кӧлесаясыс, винтъясыс. Стеклӧыс артмис мӧд ногӧн нин, мукӧд йӧзӧн. Артыштӧй сэсся, кымын мортлы лои уджавны часі вылад.

Тайӧ ӧд абу на ставыс. Паровоз эськӧ эз вермы кыскавны грузсӧ (кӧрт сімсӧ), эз кӧ вӧв из шом. Из шом перйысьяс эськӧ эз вермыны уджавны, абу кӧ вӧлі лӧсьӧдӧма налы паськӧм, сідз водзӧ.

Крестьяна кӧ эз вӧдитны нянь, рабочӧйяс эськӧ эз вермыны уджавны, шуам кӧть, часітӧ вӧчны.

Водзӧ кӧ пондан думайтны, дум вылад усьӧны важ йӧз, кӧрт туйсӧ лӧсьӧдысьяс, мукӧдтор вылын уджалысьяс. Вӧлӧмкӧ, часі вылад уджалӧмаӧсь лыдтӧм-тшӧттӧм йӧз.

Збыльысьсӧ сідз век и эм. Быдӧн уджалӧны ӧтвылысь. Быд морт вӧчӧ ассьыс кужан удж. Сідзиӧн артмӧ ӧтувъя удж.

Ӧні сӧмын колӧ бурджыка, арталӧмӧн уджсӧ лӧсьӧдны, медым этшаджык вын бырӧдӧмӧн унджык позис вӧчны. Колӧ унджык лӧсьӧдны удж кокньӧдан машинаяс, мед этшаджык пондіс весьшӧрӧ мунны мортлӧн вын.

Сэки став олӧмыс пондас бура мунны.

______________

Босьтӧй мый нибудь да думыштӧй, кымын мортлы лои мырсьыны сійӧс вӧчигӧн. Гижӧй сійӧс.