МЫЙ АДДЗЫЛІС ЗАВОДЫСЬ ГАВРИК

І.

Заводӧ важӧн нин вӧлі Гаврикӧс кыскӧ. Сійӧ аддзывліс заводсӧ сӧмын ылісянь. Сулалӧ заводыс пруд дорын, тшына, ыджыд, грымӧдчысь, кузь сьӧд трубаяса. Трубаяссьыс лун и вой пуритӧ сьӧд тшын.

А рытын кӧть синтӧ эн чӧвтлы. Тырыс би: виж, еджыд, лӧз, ставнас югъялӧ, сотчӧ, грымӧдчӧ. Грымгӧм шыыс паськалӧ увтасӧд, вошӧ кытӧнкӧ прудсайса сук вӧрас.

Рытын завод, чардалан кымӧр моз, гымалӧ, югъялӧ тшын пытшкын. Корсюрӧ мыйкӧ быттьӧ потлӧ, пемыд кымӧръяссӧ ӧзтывласны.

[...]

Тшанын пӧртмасьысь сывдӧмыс зэв долыд синмыдлы, зэв быттьӧ небыд да лӧсьыд. Веськалас кӧ эськӧ сэтчӧ морт, гут моз сотчас дзикӧдз, весиг ӧти лытор ог коль.

ІV.

Мунігмоз пырыштлісны механическӧй цехӧ. Жырыс ыджыд, югыд.

Быдсяма сикас машинаыс мыйтӧм! Небыдика шпорӧдчигтырйи котралӧны машина бергӧдлысь тасмаяс, синмӧн кыйтӧм ӧдйӧа бергалӧны кӧлесаяс, ӧдва-ӧдва вӧрӧны гырысь валъяс.

Гӧгӧр йиркакылӧ, грымакылӧ, гольӧдчӧ.

— Тані вӧчалӧны уна сикас машинаяслысь торъяссӧ, — висьталіс Ваня. — Тані и ыджыд валтӧ шыльӧдасны, ичӧтик винттӧ вӧчасны и, — быдтор.

Мунам!

V.

Бара ыджыд керка. Тшына, рӧмыд, кӧть эськӧ йиркыс и стеклӧысь да. Биа вомъяссӧ жергӧдӧмӧн сулалӧны неыджыд пачьяс. Биыс пачьяссьыс сідзи и пуркйӧ.

Воссис ӧти пач вом. Югыд биыс ёрис синъяс. Рабочӧйяс сэтысь кыскисны еджыдӧдз доналӧм кӧрт чурка; новлӧдлан машина кватитіс сійӧс да нуис кытчӧкӧ.

— Ӧні сійӧс вӧсньӧдны кутасны, — шуӧ Ваня.

— Кыдз нӧ вӧсньӧдасны?

— Машинаӧн.

Мунісны вӧсньӧдан машина дорас. Кӧрт чурка помсӧ сюйисны машинаӧ. Машина дзижгис-дзижгис, кӧрт чурка быйкнитіс мӧдар боксьыс вӧснялӧмӧн, нюжалӧмӧн. Сійӧс бара машина пыр лэдзисны, — ещӧ кузьджык лои. Коймӧдысь, нёльӧдысь. Машина пыр быд лэдзӧмӧн кӧрт чурка век нюжаліс кузьджыка да кузьджыка, кызтаыс век чині, лои зэв кузь вӧсньыд шатин кодь.

Сійӧс сэсся куснялісны да пуктісны бокӧ.

— Вот и эштіс, — шуӧ Ваня. — Ӧні нуасны складӧ, сэсся вузаласны. Кузнеч ньӧбас, вӧчас мый колӧ. Мый, пӧттӧдзыд видзӧдін?..

VІ.

Найӧ петісны. Ставсӧ видзӧдӧмысь Гавриклӧн юрыс бергӧдчӧ. Сійӧ весиг шатлалӧ, нинӧм оз вермы шуны, сӧмын мӧвпалӧ: „Кыдзи со йӧзыс тані уджалӧны-а, кыдзи кужӧны уджавныс“.

Кор дзикӧдз петіс заводысь, кайис сён вылӧ, видзӧдліс тшына биа пытшкын сулалысь завод вылӧ, заводыс кажитчис муса, быттьӧ нэм кежлӧ йитчис сыкӧд.

Гортас котӧртігӧн Гаврик мӧвпалӧ:

— Кӧть нин эськӧ ӧдйӧджык арлыдӧй содіс. Быдма да понда заводын уджавны, батьяскӧд тшӧтш. Ок, лӧсьыд лоӧ!