КЫДЗИ РАБОЧӦЙЯС ОЗЫРЪЯСЛЫСЬ МЫРДДИСНЫ ВЛАСЬТСӦ
Октябр тӧлысь кежлӧ большевикъяслӧн вынйӧрыс ыджыд нин вӧлі. Уджалысьяс партия туйӧд, Ленин бӧрся, кутісны мунны сюрсъясӧн, миллионъясӧн. Ӧні большевикъяс вермасны надеяпырысьджык водзсасьны. Ленин сэкъясӧ ёртъясыслы шуліс:
— Виччысьны сэсся нинӧмла. Ӧні кӧ ӧружитчӧмӧн ог петӧ, сёрмам, мыж вӧчам уджалысьяс водзын да революция водзын.
Октябр 25ʼ лунӧ большевикъяс рабочӧйяскӧд асывсяньыс петісны буржуазиялысь мырддьыны власьтсӧ. Питерын большевикъяс водзысь водзӧ кутісны босьтавны казеннӧй керкаяссӧ, орӧдісны быдласянь сёрни йитӧдъяссӧ, туйяссӧ. Буржуазияыдлӧн правительствоыс лои орӧдӧма быд государствоысь, некодсянь найӧ эз кутны вермыны отсӧгъяс корны, сёрнияс нуӧдны.
Большевикъяслӧн войскаыс кутіс зырсьыны Зимньӧй дворечӧ, временнӧй правительство пукаланінӧ.
Рытъя сизим часын Зимньӧй двореч видзысьяс чукӧрӧн-чукӧрӧн кутісны пышъявны, сетчыны гӧрдармеечьяслы. Вой кежас зэв нин ёна этшмис налӧн выныс. Кодсюрӧяс большевикъяслӧн кутісны сибавлыны дзик нин двореч бердӧдзыс. Кык часын войнас большевикъясыд дворечтӧ дзикӧдз босьтісны, быд петан ӧдзӧсъяссӧ тупкисны да пырисны пытшкас. Большевикъяслӧн юрнуӧдысьыс вӧлі Антонов.
Налӧн пырӧм шыыс кыліс министръяс заседайтан вежӧсӧдз. Кодыс вугралӧ, кодыс законъяс на вӧлі лӧсьӧдӧ, — быдӧн звирс чеччисны кок йылас.
На дінӧ медводзын пырис Антонов, сы бӧрся ызӧбтісны салдатъяс, матросъяс; ӧти сутш пӧраӧн залыд наӧн тыри.
— Временнӧй правительствоын юралысьясыс ті?
— Ми, ми! Мый угоднӧ тіянлы?
— Сӧвет правительство ним кузя тіянӧс арестуйтам!
Временнӧй правительство вочакыв шутӧг сетчис.
Кутісны гижны протокол. Правительствоын юралысьыс удитӧма водзвыв пышйыны. Салдатъяс ку пиас эз кутны тӧрны.
— И тайӧяс вермасны пышйыны! Мыйӧс нин протоколсӧ? Зурйӧдлін дай, некутшӧм протокол оз ков!
— Нинӧм тайӧясӧн лебезитчыны!
Арестованнӧйясӧс колӧ вӧлі нуны крепӧсьтӧ. Автомобильясыд сэк шӧрӧ весиг ӧти эз лӧсяв.
— Кутшӧм нин автомобиль! Мед подӧн мунасны, кокнысӧ веськӧдыштасны, — шуалісны салдатъяс.
— Иш, кутшӧм баринъяс! Тырмас, ёна нин автомобильнад гуляйтлісны.
Заводитчисны нуны найӧс подӧн Петропавловскӧй крепӧсьтӧ.
Двореч коридорас чукӧртчӧм салдатъяс гызисны:
— Кысь нин тайӧ бесъяссӧ лыпйӧмныд?
— Небось абу на дорынӧсь вӧлӧмаӧсь!
— Керенскӧйыс нӧ?.. Петкӧдлім эськӧ сылы!..
Ывлаас (дворас) бара гызисны.
— Кытчӧ нӧ нуӧданныд?
— Петропавловскӧй крепӧсьтӧ!
— Пышъясны ӧд!.. Зурйӧдлӧй дай, этшаджык ноксьӧм.
Тадзи вӧлі босьтӧма Временнӧй правительствоӧс да йӧртӧма Петропавловскӧй крепӧсьтӧ.
