ФЕВРАЛЬСА РЕВОЛЮЦИЯ
Заводын.
Ме сэки уджалі Мӧскуаын, заводын. Меным вӧлі ар дас кӧкъямыс. Миян вӧлі асланым кружок, пыр вӧлі кывзам висьтавлӧм Сергей нима рабочӧйлысь. Войнасьыд быдӧн нин дӧзмисны, быдтор донсяліс, нянь оз тырмы, ку пытшсьыс петӧны быдсӧн. Кор воис миянлы юӧр — Питерын пӧ революция, — ми шуим босьтчыны жӧ.
Локталім заводӧ, сӧмын уджавны эгӧ кутӧ. Чукӧртчим дворӧ. Шыӧдчис олӧма рабочӧй — Суков:
— Ёртъяс, инӧн-ладӧн ми огӧ на тӧдӧй, мый Питерын вӧчсьӧ, кутшӧм-сэтшӧм сэні революция. Вай огӧ тэрмасьлӧй, виччысьлам объявленньӧ.
Старикъяс сы дор пондывлісны шыӧдчавны. Петіс Сергей.
— Мый нӧ, шуӧ, миянлы мойдӧны?!. Виччысьӧмнад ӧти мужик став семьясӧ тшыгйӧдлӧма нин. Виччысьны оз позь, кадыс оз тшӧкты. Вайӧ ӧдйӧджык бӧръямӧ рабочӧйясӧс сӧветӧ. Пондамӧ ассьыным бӧрйӧм йӧзӧс дорйыны, вермасьны. Мунамӧй Дума дор площадь вылӧ!
— Збыль, збыль! — горӧдісны рабочӧйяс: — Сергей буртор висьталӧ.
Бӧрйим куимӧс сӧветӧ, сетім кузь гудок, мӧдӧдчим мукӧд заводъясӧ уджалӧмысь дугӧдны. Ми вӧлі сюрс кык кымынӧн нин Краснӧй площадь вылӧ мунігӧн.
Краснӧй площадь вылын.
Ми мунім оружйӧтӧг моз: миян вӧлі сӧмын куим бомба да ӧти револьвер. Уськӧдчылісны эськӧ миян вылӧ полицейскӧйяс да, ми найӧс повзьӧдім, — пышйисны переулокӧ.
Миян чукӧр соді и соді. Краснӧй площадь вылӧ воӧм бӧрын миян синъяс паськалісны: сы мында йӧзыс чукӧрмӧма, быд уличаысь тувсовъя ытвадырся ю моз локтӧ. Гӧгӧр шпоркӧдчӧны гӧрд флагъяс, гижӧдъясӧн: „Рабочӧйяслы нянь!“, „Войналы пом!“, „Сар правительстволы пом!“
Сергей кайис пӧнар сюръя вылӧ, гӧлӧсыс труба кодь:
— Ёртъяс! Судзӧдӧй оружйӧ код кыдзи верманныд, мунамӧй казармаӧ, салдатъяс дінӧ. Найӧ — миян вокъяс. Мунамӧй тюрмаясысь лэдзавны уджалысьяс дор пессьысьясӧс.
Сюйсим Дума дорӧ. Кодкӧ кайӧма вылӧ да горзӧмӧн висьтавлӧ Питерса выль юӧръяс. Миян бӧрйӧм йӧзыд Сергейкӧд пырисны Думаӧ. Ми унаӧн мунім казармаясӧ.
Казармаясын.
Медводзын мунісны инвалидъяс — коді пу кока котшкӧдӧ, коді китӧм. Найӧ тэрмасьӧны муніганыс, синъясныс ӧзъясьӧны. Ме нуа гӧрд знамя. Миян бӧрся ньӧжйӧник вӧтчӧ грузӧвик; сы вылын сувтсӧн кутчысьӧмаӧсь мӧда-мӧдас салдатъяс, рабочӧйяс.
Казарма дворас сулалӧ быдса полк, винтовкаясаӧсь. Салдатъяс миянӧс эз лыйлыны. Офицеръяс эз тыдавны, сӧмын ӧти томиник прапорщик вӧлі салдатъясыскӧд.
— Салдатъяс, салдатъяс, ура!.. — горзӧны гӧгӧр. — Вокъяс, ура!
Петіс беддя морт, шуӧ:
— Салдат ёртъяс! Воис кад. Мунӧй уджалысьяскӧд свобода перйыны! Ме вот коктӧм, но и ме кӧсъя кувны революция понда. Войналы пом!
Йӧзкӧд ӧтвылысь.
Салдатъяс горӧдісны миянлы: ура! Кытыськӧ воисны музыкантъяс. Медводзӧ лэдзим музыкантъясӧс, сэсся салдатъясӧс, на бӧрын мӧдӧдчим асьным.
Дума дорын ӧзтӧмаӧсь бипуръяс. Горзӧмыд, нимкодьыд йӧзыдлӧн вӧлі, кор аддзисны штыкъястӧ да кылісны музыкатӧ.
Ме пыри Думаӧ. Сійӧ войнас узьӧм эз ло. Йӧз ветлӧдлӧны, увгӧны, прикладнаныс камгӧны. Сійӧ войнас Мӧскуа пасьтаысь важ власьтсӧ бырӧдісны, асывнас Дума дорын пушкаяс нин сулалісны революцияӧс дорйыны.
