ВЛАДИМИР ИЛЬИЧ ЛЕНИН

Владимир Ильич Ленин нэм чӧжыс тӧдіс ӧти ыджыд удж: сійӧ мырсис рабочӧйясӧс да крестьянаӧс фабрикантъяс, помещикъяс, купечьяс чорыд кабыр улысь мездӧм понда.

Сарлӧн чиновникъясыс ёна топӧдісны Ленинӧс. Сійӧс пукӧдавлісны тюрмаын, ыстывлісны Сибырӧ. Ленинлы уна во лои овны ылі йӧз муясын, заграницаын. И тюрмаын, и ссылкаын Ленин век нуӧдіс ассьыс удж: велӧдчис ачыс, велӧдіс мукӧдӧс, гижаліс нигаяс, сійӧ нигаясас индаліс уджалысьяслы, кутшӧм туйӧн верман синны озыръясӧс.

Владимир Ильичлысь кывзісны: сы бӧрся мунісны став му пасьта уджалысьяс. Ленин вӧлі налӧн медбур друг, ыджыд вежӧра велӧдысь, сетчытӧм юрнуӧдысь.

Ленин лӧсьӧдіс ён коммунист большевик партия.

Ленин кыпӧдіс уджалысьясӧс сарлы, помещикъяслы, фабрикантъяслы, купечьяслы паныд. Ленин юрнуӧдӧмӧн уджалысьяс вермисны озыръясӧс.

Ленин лӧсьӧдіс сӧвет власьт. Ленин пуктіс панассӧ ставмувывса, быд сёрниа уджалысьяс ӧтувтчӧмлы. Нимыс сійӧ ӧтувтчӧмыслӧн „Коммунистъяс Интернационал“.

Ёна мустӧмтісны Ленинӧс озыръясыд. 1918 воын кӧсйисны сійӧс вины, лыйлісны револьверысь, да кувмӧныс эз ло — бӧр бурдіс.

Сьӧкыд уджалӧмыд помаліс Владимир Ильичӧс. Дыр висьӧм бӧрын сійӧ куліс 1924 вося январ 21ʼ лунӧ.

Кулӧм бӧрас ёна шогсисны ставмувывса уджалысьяс.

Ленин кулі, а велӧдӧмыс ловъя, сылӧн панӧм уджыс лоӧ помалӧма!

ЯНВАР 21ʼ ЛУН — СТАВМУВЫВСА УДЖАЛЫСЬЯСЛӦН ШОГСЯН ЛУН: СІЙӦ ЛУНӦ 1924ʼ ВОЫН КУЛІ ВЛАДИМИР ИЛЬИЧ ЛЕНИН.