ПАРАКОД ЛОКТӦМ

Миян сиктӧ войдӧр паракод оз вӧлі волыв. Коркӧ пондісны висьтавны, таво пӧ волыны кӧсйӧ. Ме ичӧт на вӧлі. Виччысьӧмыд миян!

Ӧти асывводзӧ вӧвъяс гӧнечӧн лудысь локтісны сиктӧ, зэв ёна повзьӧмаӧсь мыйыськӧ. Ме котӧрті ывлаӧ. Кывза: мыйкӧ, кылӧ, буткӧ. Кайи керка вылӧ, видзӧда кывтыдлань — тшын тыдалӧ.

— Паракод! Паракод! — понді горзыны.

Лэччи ӧдйӧнджык керка вылысь, котӧрті вадорӧ. Сэні чукӧртчӧмаӧсь нин челядь. Котӧрӧн мӧдӧдчим паракодлы паныд.

Кык километр сайын кымын паныдасим паракодкӧд. Кыскӧ кык баржа, зэв мудзӧмпырысь кӧлесаяснас буткӧ.

Вадорас вӧвъяс пельнысӧ чошкӧдӧмӧн видзӧдасны-видзӧдасны да гӧнечӧн пондасны пышйыны.

Паракод сикт дорӧ воигӧн зэв кузя горӧдіс. Вӧвъясыд мый сэн керсисны! Мукӧдыс дас километр сайӧ вӧрӧ гӧнитӧмаӧсь, бӧрыннас ӧдва сюрисны. Миян быдсӧн жӧ сьӧлӧмным чеччавны пондіс.

Бабаяс вӧлӧм пӧжасьӧны да, ставсӧ эновтӧмаӧсь, котӧртӧны. Уна и нянь сотчис сійӧ асывводз.

— Коді бара кӧлесасӧ бергӧдлӧ-а? — юасьӧны мӧда-мӧдлысь. Некод оз тӧд. — Час, мися, велӧдысьлысь юасям.

Мӧд лунас велӧдысь миян висьталіс — кыдзи паракодыс ветлӧ, коді сійӧс медвойдӧрсӧ вӧчлӧма.

_______________

Волывлӧ оз тіянӧ паракодыс? Кутшӧм нима паракодъяс аддзывлінныд? Став паракодыс-ӧ ӧткодь? Кыдзи торъялӧны груз кыскалан паракодъяс йӧзӧс новлӧдлан паракодъясысь? Вӧлӧн али паракодӧн лӧсьыдджык ветлыны? Мыйла? Вӧлӧн али паракодӧн бурджык груз кыскавны?

Арталӧй, кымын ӧдйӧ тіян сиктсянь позьӧ воӧдчыны Сыктывкарӧдз паракодӧн, вӧлӧн дорысь. Юалӧй, дона-ӧ сулалӧ ӧти кг груз вайӧм Сыктывкарсянь тіян сиктӧдз вӧлӧн, да дона-ӧ паракодӧн. Арталӧй, 100 кг груз паракодӧн вайӧм унаӧн-ӧ донтӧгджык сувтас вӧлӧн вайӧм дорысь.