МЕДВОДДЗА ПОЕЗД

Тайӧ вӧлӧма сё во сайын, Англияын. Важысянь нин сэні перйывлісны из шом, да и ӧні на ёна перйӧны. Англичана из шомсӧ мукӧд государствоясӧ вузавлӧмӧн ёна нажӧвитчӧны. Ставыс эськӧ бур вӧлі, да ӧтитор торкӧ: из шомсӧ перъянінъясыс ылынӧсь моресянь. Море дорӧдзыс кыскавны лоӧ вӧчны бур туйяс. Сійӧ туйяс кузя из шомсӧ вӧлі кыскалӧны вӧвъясӧн, сэсся грузитӧны карабъяс вылӧ да нуӧны кытчӧ колӧ. Вӧвъяснад кыскалӧмыд донӧн вӧлі сувтӧ.

Сэки парӧвӧй машинаястӧ вӧлі тӧдӧны нин: машинаясӧн вӧлі кыскӧны ва шахтаысь, из шомсӧ сійӧн жӧ лэптӧны. Морт-мӧд озыр йӧз сёрнитісны кыдзкӧ донтӧммӧдны груз кыскалӧмсӧ. Шуисны награда сетны, коді вермас лӧсьӧдны груз кыскалан машина.

Ӧти мастер, Стефенсон, лӧсьӧдіс сэтшӧм машинасӧ: вӧчис паровоз.

Машина видлалісны, шуисны шогманаӧн, вӧчисны кӧрт туй кык кар костӧд.

Ӧти лунӧ кӧрт туй дорӧ чукӧртчӧмаӧсь уна йӧз. Ёна ас костаныс вензьӧны. „Кысь нӧ пӧ машина пондас ачыс мунны; ылӧдлӧ пӧ, йӧйтӧдлӧ бур йӧзсӧ Стефенсоныд“, шуӧны ӧтияс. „Колӧ пӧ ордлыяссӧ чегъявны, мед мӧдысь оз понды ылӧдчыны“, шуӧны мукӧд.

Рельсы вылын сулалӧ машина, чушкӧ. Машина трубаӧдыс петӧ тшын. Йӧз полӧны сыысь, оз лысьтны матыстчыны.

Локтіс Стефенсон, кайис машина вылӧ.

— Видзӧд, кайис, кайис!.. Пач вылас кайис...

— Шоныд тэныд, паччӧр вылад, — горзӧны Стефенсонлы, сералӧны сійӧс.

Стефенсон оз шыӧдчы. Ӧтилаӧд вӧрзьӧдіс да, машинаыс горӧдіс, вӧрзис мунны.

— Мунӧ, мунӧ! — горзӧны йӧз, вӧтчӧны машина бӧрся. Кысь бара, машинаыд ӧдйӧ на тай найӧс бӧрӧ колис.

Регыд Стефенсон бӧр бергӧдчис. Рельсы вылысь из шом тыра вагонъяс йитліс машина бердас да ставсӧ зэв ӧдйӧ нуис.

— Вот тайӧ и вӧв! Сё вӧв пыдди ӧтнасӧн кыскис, — горзӧны йӧз чукӧрас.

Тайӧ вӧлі 1829 воын. Сы бӧрын быдлаын пондісны кӧрт туйтӧ вӧчны. Быдсӧн гӧгӧрвоисны, кутшӧм пӧльза кӧрт туйсьыд: ӧдйӧджык мунан да донтӧгджык сувтас.

Сэксянь паровозыд ёна нин вежласис, воысь воӧ бурджыкӧс вӧчӧны.