ЭЛЕКТРИЧЕСТВО

Оланінъяс да уличаяс каръясын, бӧръявыв сиктъясын тшӧтш, пондісны югдӧдны электричествоӧн. Электричество перйӧны заводъясын жӧ, сӧмын сійӧ шусьӧ электрическӧй станцияӧн. Газ вайӧдӧны коланінӧ гыркса кӧрт пыр, электричество — сутуга кузя. Керкаын лӧсьӧдӧны электрическӧй лампаяс. Электричествотӧ ӧзтыны газтӧ дорысь кокниджык на, весиг истӧг оз ков. Бергӧдан — ӧзъялӧ, мӧдысь бергӧдан — кусӧ. А югъялӧ ёна. Сэсся электричествосьыд пӧжар оз вермы лоны — сійӧн бур. А карасин лампасьыд зэв уна пӧжарыд овлывлӧ: прӧступкаӧн уськӧдасны — керкаыс ӧзъяс. Овлӧ лёкыд и газ помысь. Ӧтчыд му вӧригӧн (землетрясенньӧ дырйи) Японияын газ нуан гыркса кӧртыс потӧма, газыс ӧзйӧма, сэсся зэв ыджыд пӧжар лоӧма. А электричество лампаыд кӧ жугалӧ, нинӧм оз ло, сӧмын пемыд лоӧ.

Кӧнсюрӧ электричество кындзи мукӧд пӧлӧс югдӧдан оз позь лӧсьӧдны. Босьтам кӧть карасин вӧчанін. Сэні став муыс, сынӧдыс быдсӧн, тырӧма нерпӧн. Ӧти бикиньысь вермас ыпнитны пӧжар, вӧчны зэв ыджыд убытка. Сэні сӧмын электричествоӧн югдӧдан позьӧ лӧсьӧдны.

______________

Вӧчӧй татшӧм опытъяс.

1. Босьтӧй гуттаперча сынан да сыналӧй юрсинытӧ. Сэсся инмӧдӧй чуньнытӧ. Мый кывланныд? Вӧчӧй тайӧ опытсӧ пемыдын, мый аддзывланныд?

2. Босьтӧй стеклӧ тор. Пуктӧй сійӧс кык нига вылӧ. Нигаяс костас кольӧй кушин, пукталӧй сэтчӧ вӧсньыдик кабалаторъяс. Стеклӧсӧ зырыштӧй шӧвк торйӧн. Мый казяланныд?

3. Рисуйтӧй да гижӧй, кутшӧм опытъяс вӧчинныд.