КАР ВОЙЫН

Ми Мӧскуаӧ воим войын. Кызь кымын километр сайсянь на ӧти морт казяліс:

— А со Мӧскуаыд югъялӧ!

Ме видзӧдлі вагон ӧшиньӧд. Гӧгӧр дзурс пемыд, сӧмын водзын енэжыс югыд, быттьӧ пӧжар дырйи, сӧмын югыдыс оз пӧртмась, век ӧткодь.

Быдӧн пондісны чукӧртны да кӧртавлыны кӧлуйнысӧ. Ми лӧсьӧдчыны жӧ пондім. Быдӧн гажмисны, нимкодь лои Мӧскуаӧ воӧм вылӧ. Унаӧн первой на локтӧны сэтчӧ.

Час джын бӧрын воим Мӧскуаӧ. Петім платформа вылӧ.

Гӧгӧр югъялӧ электричество би. Ем кӧть усьӧ, оз вош.

— Видзӧд, биыс мыйтӧм! — шуис Педӧр. — Абу бара миян сиктын кодь пемыд.

— А тӧдан, Педӧр? Ме ӧтчыд вӧлӧн вӧлі локта войын асланым карӧ, да югӧрыс зэв жӧ ылісянь тыдалӧ, — шуис Наста.

— Дас пӧнарсьыд тыдалӧ? Шуан ӧд жӧ...

— Абу на сӧмын дас, унджык на, — вензьӧ Наста.

Быд улича, кыті миянлы лои мунны, ставыс зэв югыдӧсь. Пӧнаръясысь кындзи югӧрыс ёна усьӧ магазинъяс ӧшиньысь (быд магазин ӧшинь костын уна лампа ӧзъялӧ). Трамвай мунігӧн сутугасьыс петавлӧ лӧз би, быттьӧ чардыштлас. Сад шӧрын пӧртмасьӧ фонтан. Садъяс зэв уна гуляйтысь.

— А миян кӧнкӧ узьны нин водалісны, — казьтыштіс Микайлӧ.

Кежим переулокӧ. Сэні лӧньджык, да биыс кутшӧмкӧ аслыссяма.

— Николай Иванӧвич! Тайӧ югыд пӧнаръясас нӧ мый сотчӧ?

— Тайӧ газа пӧнаръяс. Помнитанныд, коркӧ вӧчлім опыт, из шомысь перйывлім газ да сотлім. Тайӧ сэтшӧм газ жӧ и сотчӧ.

— А электричествоыд югыдджык...

Регыд воим узянінӧ, школаӧ.