ПОШТА

І.

Ёгор муртса на школаысь воис. Мамыс вӧлі песласьӧ. Друг пырис письмӧ новлӧдлысь.

— Ёгорыд гортад?

Мам повзис:

— Бара нин мыйкӧ пакӧститӧма? Став юрситӧ нетшка, нэмӧн мынтӧмторлысь!..

— Танӧ сылы нига воӧма Мӧскуаысь, — сетӧ письмӧ новлӧдлысь нига.

— Мӧскуаысь?.. Ёгорлы?.. Гашкӧ абу сылы?..

— Сылы. Гижӧма: Шӧрсиктӧ, Сьӧдъюров Ёгорлы.

Письмӧ новлӧдлысь муніс. Мам чуймӧмӧн видлалӧ мича картинкаяса нига.

— Ноко, школьник, лыддьы, кутшӧм тайӧ нига?

„Кыдз нӧ Мӧскуаас тӧдісны, Шӧрсиктын пӧ эм Сьӧдъюров Ёгор?“ — мӧвпыштіс Ёгор.

Дзӧран киӧн босьтіс нига, лыддис:

„Ёж“, ежемесячный журнал для детей.

— Мый нӧ сійӧ лоӧ? — эз гӧгӧрво мамыс.

— Челядьлы пӧ тай тайӧ нигаыс.

— Сідз кӧ, тэныд инӧ... Вот дивӧыд!.. Кыдз нӧ мый тэныд ыстісны? Час, локтас батьыд, юалам.

Ёгор пырис пызан сайӧ, видлалӧ картинкаяссӧ да лыддьӧ.

— Кыдзи нӧ менӧ Мӧскуаас тӧдӧны? Збыльысь ӧмӧй меным вылӧ и гижӧмаӧсь да печатайтӧмаӧсь тайӧ нигасӧ?

ІІ.

Пажнайтігӧн Ёгор юаліс батьыслысь:

— Батьӧ, менӧ Мӧскуаын тӧдӧны?

— Кыдз нӧ оз! Став комиссарыс сӧмын тэ йылысь и мӧвпалӧны, — серӧктіс батыс. — Кыдз пӧ эськӧ миянлы не вунӧдны Шӧрсиктса Ёгорӧс, Коми муысь сэтшӧм пыстасӧ.

— Кыдз нӧ эськӧ менсьым адрессӧ Мӧскуаас тӧдӧны? — оз лэччысь Ёгор.

— Ог тӧд, сёшайт, ог тӧд, код тэнӧ эз вунӧд. Код нибудь да сетіс тэнсьыд адрестӧ. Сідз эськӧ журналыдлӧн контораыс эз куж тэныд ыстыны.

— Найӧ нӧ сӧмын меным и ыстісны?

— Эз. Найӧ зэв уналы ысталӧны. Нигасӧ уна печатайтӧны. Сэсся на вылӧ адресъяс клеиталӧны да пошта вылӧ нуӧны. Пошта вылас став журналъяссӧ, газетъяссӧ, письмӧяссӧ торйӧдлӧны коді кытчӧ мунӧ. Сэсся кӧрт туй кузя и разӧдӧны. Коми обласьтӧ локтысь письмӧястӧ Котласӧдз вайӧны кӧрт туйӧн. Котлассянь паракодӧн. Сыктывкарын юклӧны да ысталӧны сиктъясӧ. Сиктъясын сэсся письмӧ новлӧдлысь ваяс гортӧдзыд. Со и тэныд вайӧма.

ІІІ.

Лун-мӧд мысти Ёгор чожсянь воис письмӧ. Сійӧ Гӧрд армияын служитӧ. Гижӧ: „Менӧ могъясӧн ыстылісны Мӧскуаӧ. Сэні пыралі редакцияӧ да судзӧді Ёгорлы зэв лӧсьыд журнал. Мед лыддьысьӧ. Роч кывнас ӧд кужыштӧ жӧ нин гашкӧ“.

Ёгор воча гижис сылы.

„Зэв ыджыд аттьӧ, Петыр чожӧ, журналыд вылӧ. Ёна и лыддя, зэв лӧсьыд да. Письмӧ новлӧдлысь гортӧдз вайис. А ме школаын велӧдча. Роч кывйӧ велӧдчам и. Тэнсьыд ыстӧм журналтӧ унаӧн нин лыддисны. Быдсӧнлы сьӧлӧм вылас воӧ“.

Сьӧдъюров Ёгор.