МӦСКУАСА ЗООПАРКЫН

І.

Мӧскуаын, керкаяс пӧвстас, эм вӧр дітор — Мӧскуаса зоологическӧй парк. Сэні олӧны нёль сюрс дорысь унджык быдсяма сикас зверъяс, пӧткаяс, черияс, дзодзувъяс. Найӧс вайӧмаӧсь сэтчӧ ылі местаясысь.

Пыравламӧй паркас. Вӧсньыдик сутуга тыв сайысь аддзам миянладор вӧр-ваын олысьясӧс: кӧчӧс, ручӧс, кӧинӧс, ошкӧс. Сэнӧсь жӧ и лэбачьяс: варыш, рака, сюзь, кыр, уна на мукӧд. Быдсӧнлы торъя вежӧс вӧчӧмаӧсь.

Сэні жӧ матын, ыджыд прудйын уялӧны еджыд юсьяс. Паркас уджалысьяс висьтавлӧны:

„Юсьясыд олӧны нин эськӧ тані во кызь кымын, да быд тулыс и ар век на шызьыласны. Кор пондасны пӧткаяс лунвылӧ лэбны либӧ лунвылысь локны, юсьяс кутасны тшӧтш горзыны, бордъяснаныс шенавны, сӧмын тшӧтшӧдӧм бордъяснад оз вермыны качӧдчыныс-а. Быд тулыс и ар кык вежон чӧж шызяласны. Кадыс кольӧ, бӧр раммасны, пондасны бура сёйны, поздысьны, быдтысьны (тулыснас)“.

Сійӧ жӧ прудйын олӧны ылі муса пӧткаяс — Туркменистанса пеликанъяс. Зэв пелька уялӧны, чериясӧс куталӧны бакланъяс.

Друг кыськӧ ылысь кылас лэчыд вурзалӧм — сійӧ руд кӧинъяс мыйыськӧ дӧзмӧмаӧсь.

ІІ.

... Ён кӧрт ӧграда сайын турун сёйӧ зэв ыджыд зубр. Орчча вежӧсын — йӧра. Матын на дінсянь решетка пырыс нырнысӧ мыччалӧны мича кӧръяс.

Ыджыд джуджыд клетка дорын кылӧ серам, сёрни:

— Видзӧд, видзӧд, мый найӧ вӧчӧны!

Тайӧ чукӧртчӧмаӧсь быдсяма ногыс тешитчысь ӧблезянаяс дорӧ. Ичӧтик мартышкаяс, мортъяс моз, босьтӧмаӧсь кианыс яблӧг, ичӧтика курччалӧмӧн сёйӧны.

Орчча вежӧсын, шоныдінын, стеклӧ сайын, гартчӧмаӧсь кык зэв гырысь змей — питонъяс. Найӧ сёйӧны кык вежонын ӧтчыд. Зато ӧти сёйӧмас быд питонлы колӧ неыджыд ловъя порсьпи.

ІІІ.

Со кылӧ гырысь зверлӧн муралӧм. Клеткаӧд небыдика ветлӧдлӧны гырысь каньяс — тигръяс. Тигръяс — медлёк звер чукӧрысь. Син сертиныс и аддзан — ворсны оз кутны.

Ваын зэв ӧдйӧ уялӧны морскӧй левъяс. Мӧдлаын ичӧтик пруд тыр ваын олысь пӧткаӧн.

Берег пӧлӧныс тшапа ветлӧны кузь кок йыланыс фламингояс, зэв кузь, змей кодь, голяаӧсь. Клеткаясын, изъяс вылын, пукалӧны кутшъяс, грифъяс, кондоръяс. Налы дзескыд. Бордъяснысӧ кӧ паськӧдасны — кык метр дорысь паськыд лоӧ.

Торъя керкаын черияслы аквариумъяс; сэн жӧ шоныд ваын ичӧтик крокодил.

Оланінсьыс йӧрӧ петӧма слӧн, рам синъяснас видзӧдӧ йӧзсӧ, паськыд пельяссӧ вӧрӧдӧ.

ІV.

Быд лун паркӧ сюрсъясӧн волӧны челядь, тӧдмасьӧны зверъяс олӧмӧн. Унатор висьтавлӧны зверъяс оласног йывсьыс паркса уджалысьяс.

Шуам, тӧдмалӧмаӧсь найӧ дозмӧрлысь оласногсӧ.

Медым тӧдны, мый радейтӧ сёйны дозмӧрыд, сылы пуктӧмаӧсь кузь вор, вӧчӧмаӧсь сэтчӧ 11 вежӧс да быд вежӧсӧ пуктӧмаӧсь аслыссикас сёян: зӧр, проса, вотӧс, мукӧдтор. Дозмӧрыд сёйӧма зӧрсӧ да вотӧссӧ, сійӧясӧн сэсся и вердӧны ӧні дозмӧртӧ.

Зоопаркыд ёна тӧждысьӧ видзанъясыс понда. Лӧсьӧдалӧмаӧсь нарошнӧ гӧраяс, сувтӧдалӧмаӧсь пуяс, кустъяс, мед зверъяслӧн оланіныс вӧлявывса модааыс лоӧ.