КАРСА ГЫРЫСЬ КЕРКАЯС

Америкаын, Нью-Йорк нима кар уличаын сулалӧ кызь судта керка. Ӧшиньясыс лыдтӧм-тшӧттӧм. Улыс судтаас лӧсьӧдӧма бура уна ӧдзӧс, сэті лунтыр пырӧны да петӧны йӧз.

Керка пытшкӧсыс юкӧма квартираясӧ; быд квартираын эмӧсь олысьяс, семьяясӧн. Олан квартираяс кындзи керкаас эмӧсь магазинъяс быдсяма тӧварӧн, контораяс, телеграф.

Мыйысь нӧ вӧчӧмаӧсь сэтшӧм керкасӧ? Кыдзи кайӧны медвылыс судтаясас? Тайӧ керкаыд ӧд гӧра кодь, кыдз нӧ верман быд лун пӧлысь-мӧдысь сэтчӧ кайлыны да лэччывны? А челядьыс? Кыдзи нӧ найӧ вермасны кайны кызьӧд судтаад? Кыдзи йӧзыс оз повны овны татшӧм керкаад? Пӧжар кӧ нӧ лоӧ, кытчӧ воштысясны вылыс судтаясас олысьясыс?

Американцыыд вежӧра йӧз, вӧчӧмаӧсь керкатӧ да, овныс лӧсьыд и повны немторйысь. Мыйысь, шуам, сылы ӧзйыныс, весиг кӧ ӧти чагтор пуыс абу. Кыдз сідз? Абу жӧ сійӧ ставнас каменнӧй, эм жӧ кӧнкӧ джоджъяс, ӧшиньяс, ӧдзӧсъяс, куричьяс? Дерт, эм, сӧмын абу пуысь вӧчӧма: став керкасӧ лэптӧма кӧртысь да изйысь. Стенъяс, йиркъяс, ӧдзӧсъяс, ӧшинь рамаяс, — ставыс кӧрт; стенсӧ пытшкӧссяньыс вевттьӧма изразцы плиткаясӧн. Посъяс, балконъяс, перилӧяс вӧчӧмаӧсь аслыссикас стеклӧысь.

Кымынкӧ кыпӧдан машина, гырысь ящикъяс кодьӧсь, сувтлытӧг жӧдзӧны вылӧ да улӧ, улӧ да вылӧ, лэптӧны да лэдзӧны йӧзӧс. Машинаясыс уджалӧны электричествоӧн.

Керкаас сюрс кымын торъя вежӧс, кык сюрс дорысь унджык ӧшинь. Олысьыс кӧкъямыс сюрс кымын морт, став Сыктывкарса олысьнас оз на весиг тыр.

А сійӧ абу на медыджыд керка. Нью-Йоркас жӧ неважӧн вӧчисны 62 судта керка, джуджданас лоӧ 280 метр. Воысь воӧ сэтшӧм керкаясыд Америкаад пыр ӧтарӧ содӧны.

__________

Мыйла вӧчӧны ыджыд каръясас джуджыд керкаяссӧ?