КЫДЗИ МЕ ВОЛІ МӦСКУАӦ
І.
Дас вит арӧсӧдз ме Сыктывкарысь водзӧ некытчӧ на эг ветлы. Колян ар ме дядьӧкӧд мӧдӧдчи Мӧскуаӧ. Мӧскуаӧ воӧм бӧрын Ярославскӧй вокзал пыр петім площадь вылӧ. Менам быдӧн юрӧй бергӧдчис: йӧзыс ӧтарӧ-мӧдарӧ жуӧ, зильӧдӧны трамвайяс, пон моз увтчигтырйи шувъялӧны автомобильяс, карскигтырйи тэрмасьӧны мотоциклетъяс. А велосипеднад тюръялысьыд кымын!
Гырысь уличаяс пельӧсъясын, шӧрас, сулалӧны милиционеръяс. Кианыс босьтӧм гӧрд беддьӧн найӧ индалӧны, кодлы позьӧ водзӧ мунны, кодлы колӧ сулалыштны, виччысьыштны: лӧсьӧдӧны пӧрадок, мед оз талявны мӧда-мӧднысӧ. Велавтӧгыд ме вӧлі ог лысьт улича вомӧныс вуджны, шыблася ӧтарӧ-мӧдарӧ. Дядьӧ медводдзаысь жӧ на воӧма Мӧскуаад. Сійӧ вит-ӧ-квайтӧс паныдасьысь мортӧс сувтӧдліс — петкӧдлас гижӧм адрес да юасьӧ, кыдзи сэтчӧ мунны.
ІІ.
Уськӧдчим пырны трамвайӧ, да миянӧс эз лэдзны: таті пӧ сӧмын петӧны, пырнысӧ пӧ колӧ бӧрлапомсяньыс. Локтіс мӧд трамвай, пырим... Вӧлӧмакӧ, абу миянлы колан номерыс трамвайыдлӧн. Кондуктор звӧнитіс вожатӧйлы. Вожатӧй сувтӧдіс трамвайсӧ, миянӧс чеччӧдісны. Дядьӧ скӧрмис:
— Тані весиг он куж и сӧвныд... Мунам лучшӧ подӧн.
Керкаясыс Мӧскуаад каменнӧйӧсь. Уличьяс шӧрсӧ изйӧн вольсалӧмаӧсь, мукӧдлаас джодж кодь шыльыда вӧчӧмаӧсь. Ӧтар-мӧдар бокъясас, весьт мында вылӧджык, вӧчӧмаӧсь йӧзлы ветлыны тротуаръяс, зэв жӧ шыльыдӧсь. Юр весьтын зэвтӧмаӧсь сутугаяс. Паныдасьласны башня кодь джуджыд керкаяс: выліӧдзыс видзӧдлан — шапкаыд усьӧ. Кыдзи вылі судтаясас и кайӧны? Сиктад ми керкасьыд луннад гашкӧ сёысь петавлам, тані кӧ сымдасьыд пондан лэччывны да кайны, дерт кӧнкӧ, регыд коктӧмман.
ІІІ.
Арбатскӧй площадь вылӧ воим рытнас нин. Видзӧда — тырыс йӧз чукӧрмӧма, чатрасьӧны; кылӧ — зэв гора граммофон сёрнитӧ. Мыйсяма дивӧ нин, мися, тайӧ? Тайӧ пӧ радио. Ёна юасьӧм эз ло, тэрмасям да, мися, мӧдысь тӧдмала. Трамвай сувтланінӧ ӧшӧдӧмаӧсь зэв ыджыд часі, квайт час нин петкӧдлӧ. Ӧдйӧнджык мӧдӧдчим водзӧ.
Миян тӧдсаным олӧ Денежнӧй переулокын, ӧдва и аддзим. Сэні лӧньджык нин, сӧмын матын ёна паровозъяс буксӧны.
Шойччышта, тӧдмасьышта да, став Мӧскуасӧ видлала, Краснӧй площадь вылӧ Ленин мавзолейӧ вола. Сӧмын вот колӧ трамвайяссӧ тӧдмавны, кытчӧ кутшӧм номер ветлӧ. Миян тӧдсаыдлӧн вӧлӧма Мӧскуалӧн планыс. Этша и видлалі, тӧдмалі, быдсӧн синмӧй доймыны кутіс.
Ме чайта, Мӧскуатӧ кӧ кык вежон чӧж видлавны, рисуйтавны да гижавны, эськӧ быдса нига артмас.
