ГЫНДЕЙЯС
Мыйӧн медводдза пужъяс усьны кутасны, Висерсянь миянладорӧ воӧны гындей гӧсьтъяс.
Балаяс тыра черань кодь нопъяӧсь, киняуланыс летчан вужъяӧсь, — ветлӧдлӧны найӧ керкаысь керкаӧ, кӧмӧдӧны быд керкаысь семья кодьсӧ.
Аръявыв, вундан кадӧ, шырӧны ыжъясӧс. Сэкся вурунтӧ видзӧны гын сапӧгъяс вылӧ да гынъяс вылӧ. Тувсов вурунтӧ печкӧны, гын сапӧг вылад оз туй, оз гынмы.
Миян сиктӧ гындейясыд воысь воӧ унаӧн волӧны. Пырасны меддор керкаас, юасясны: сюрӧ-ӧ гындысянъяс, а гындысяныд самӧй сэки и сюрӧ.
____________
Медвойдӧр удж вылӧ босьтчӧ летчысь.
Летчан вужсӧ ӧшӧдӧны стенӧ. Сы весьтӧ уліас раз лӧсьӧдӧны, буретш морӧспаньӧдзыс летчысьыслы. Шуйгаладор помас разсяньыс лабичӧдз тыв лэдзӧны, летӧм вуруныслы лэччыны. Летчан вужйыслӧн везйыс буретш разӧдзыс. Везсӧ гартӧны ыж сювйысь.
Пуктасны раз вылад вурунтӧ, пызяласны ичӧтика, мед ёнджыка да кокньыдджыка летчысяс. Кутас летчысьыд брунгыны летчан крукнас. Быд брунгӧмысь везйыд асланьӧдыс вылӧ чеччыштлӧ. Вуруныд гартыштчӧ вез гӧгӧрыд. Кымын унаысь гартыштчылас, сымын сійӧ ёнджыка кутас небзьыны. Быттьӧ кизьӧриник ру, личыдика пуксьӧ лабичӧ. Бусыс, тшын моз, пуркйӧдлӧ раз вывсьыс, кокньыдджыкъясыс керка пытшкӧс сынӧдсӧ рудӧдӧны, сьӧкыдджыкъяс раз улас лыа моз пуксьӧны.
Брун на, брун на, бизь-бизь, брун-брун, зят-зят — кылӧ летчӧм шыыс, быттьӧкӧ мыйкӧ шуны кӧсйывлас да оз удит помавнысӧ. Летчысь крукнас шӧтӧ и шӧтӧ, дзирнясьӧ пельпом сынаннас, вежнясьӧ тушанас.
Летӧм вурунсӧ пансьысь ӧткызаа разӧдас панан дӧра вылӧ, водзын бедь гартыштас дӧра помас, сэсся тубыртас вуруннас да кутас быглявны пызан вылын. Кыскыштӧ-быгыльтӧ, кыскыштлӧ-быгыльтлӧ — чиш-пош, чиш-пош...
Кор нин гынмыштас, сійӧ жӧ быглясьысьыд панас гын сапӧг. Ыджыдӧс, ӧтарас и мӧдарас ныра, — ёна и повзьылан кык ныра гын сапӧг гындӧмысь.
Коймӧд морт, гындысьыс, босьтас панастӧ да пыдзрӧдлас пӧсь ва пиын. Войдӧр, кыкысь кӧтӧдлӧм бӧрын, балатӧг на гындас, нёльпельӧса кӧрт паличӧн быгльӧдлас панас вывтіыд. Няйтыс палич водзвылас кыза мунӧ, лабич джынсӧ весь ойдӧдӧ. Сюяс гӧлень пиас бала мода палич да кыдз тай кутас школӧдны — ӧкӧнчаяс таркакывны кутасны. Сэкъясӧ пачсьыд пӧсь ватӧ оз бырӧдлыны.
Мыйкӧ и керас гындысьысьыд ва кӧлач кодь панастӧ: пыдзрӧдлӧ — быттьӧкӧ мыйкӧ мыськӧ, быглялӧ, дурпопӧс моз бергӧдлӧ, школӧдӧ, — быттьӧкӧ пиньсӧ йирыштӧмӧн кодӧскӧ нӧйтӧ.
Панасыд руасьӧ, ачыс пӧсялӧмысла сідзжӧ руалӧ. Керка пытшкӧсад быттьӧ кыз кымӧрӧн нёйкмӧдчӧ.
Кор нин панасыд гын сапӧг модаа лоыштас, зэвтасны бала вылӧ, зыртасны кузь сісӧ кутшӧмкӧ изйӧн да вой кежлӧ песъяс вылӧ лӧсьыда пуктӧмӧн пачӧ дзумгасны.
Аскинас тэныд сетасны зэв мича выль гын сапӧг.
____________
Гындысьысьяслӧн уджыс сьӧкыд, дзоньвидзалунтӧ воштана. Лэчыд бусыс тыясад пуксьӧ. Руыс да ёна вын бертӧмыс водз эбӧстӧ нёньыштӧ.
______________
Рисуйталӧй гындейяслысь уджалан кӧлуйнысӧ. Гижалӧй нимъяссӧ.
Юасьӧй налысь уджалан донсӧ. Арталӧй, уна-ӧ нажӧвитӧны лунӧн, тӧлысьӧн.
