КЫДЗИ ВАСЬӦ ВӦВ ДЕДӦС КЫЙИС
Васьӧлӧн батьыс ёна майшасьӧ:
— Зонмӧ, арся вӧв да куйӧд ӧдва петкӧдӧ... Мый и лоӧма? Абу ӧд яйтӧм!.. Яйтӧм кӧ ӧд — эбӧсыс нин, шуам, абу-а...
Васьӧ батьыслысь майшасьӧмсӧ кывзіс да шуӧ:
— Бать, мыйла нӧ чибӧыд быд асыв зэв ёна пӧсялӧма? Кор тай лэдзан юктавны, сэк и руалӧ-а...
— Ог тӧд, пиӧ, мый лоӧма... Турунсӧ, тыдалӧ, оз жӧ курччывлы... Быд асыв тай ӧбледьсӧ мӧсъяслы лоӧ петкӧдны-а... Абу нин йӧз ӧнія дырйи. Юктавныд он лысьт лэдзлыны... Лоӧ, тыдалӧ, нимвидзысьӧс корлыны: дерт, вомдзалісны... Кысь нин, пыр шодлӧ да, он лысьт ки йывсьыд лэдзны.
Вайисны нимвидзысьӧс. Пызйис вӧлӧс ваӧн, тшынӧдіс тусяпуӧн, лыддис кутшӧмкӧ тӧдтӧм кывъяс да шуӧ:
— Ёгор Як, бурдас сэсся вӧлыд!
Бать бара на чуймалӧ: некыдз оз бурд вӧлыд, сё пӧгиб.
Ӧтчыд лясни увсьыс Васьӧ сьӧдбӧж туй аддзис. Сэтчӧ тӧкӧтьӧ вӧлі лымйӧн пуркӧдыштӧма да, зэв лӧсьыда трӧпаыс тӧдчӧ. Сэки жӧ Васьӧ лясни улад силянка пуктіс. Яй самалыштіс, медым сьӧдбӧж гӧняйтлӧм бӧрас чӧсмасьыштас да и самасяс.
Васьӧлӧн батьыс дзик нин матӧ воӧма.
— Вӧв дед нин кӧ-а? Дерт бара, сійӧ мучитӧ, бурысьыс тай дзикӧдз дзугсьӧма-а... Сідз кӧ, ог тӧд нин кыдзи сыысь мынтӧдчан!.. Весиг пӧ ӧд молитва оз имит... Гидня местасӧ лоас вежны... Ещӧ кӧ оз эновтчы, вӧвсӧ нин кӧ вежны-а, выль гӧнаӧс лӧсьӧдны. Бура тай эськӧ бур вӧв да, мый керан, сэтшӧм нин, тыдалӧ, ки.
Вӧвнад вежсьысьыд регыд и воис. Сӧмын на кӧсйӧ ас думнас Ёгор Якыд, кыдзи и кывсьӧ йӧзӧдзыс...
— Вежа, — кӧсйысьӧ Яков. — Нёль арӧса чибук... Раминик чибук, дзик эськӧ Васьӧлы кодь да, киӧй оз, тыдалӧ, лӧсяв.
Пильӧлӧн вӧв омӧлик, шеньӧбтӧм, дуркиник кынӧма, пӧрысь — гашкӧ кызь арӧса нин...
Васьӧлы вӧлыс синва петмӧныс жаль. Петіс сыркъялігтырйи гидняӧ, жальпырысь видзӧдӧ чибукыс вылӧ. Друг кутіс лясни увсьыс чирзӧм шы кывны... Чань чошйӧдлӧ нырнас, биысь моз полӧ. Видзӧдліс Васьӧ — сэні еджыд каньпи кодь шедӧма силянкаӧ да чирзӧ-пессьӧ. Пыртіс керкаӧ, батьлы ошйысьӧ:
— Бать, лясни улысь со мый шеді. Чибӧыд зэв ёна таысь полӧ!.. Мыйӧн тайӧ чирзыны кутіс, толькӧ и сювтчӧ, стенмысь-стенмӧ гӧняйтлыны кутіс.
— Тайӧ ласича да!.. Тайӧ ӧд оз жӧ кӧнкӧ вӧвъясӧс ӧбӧдит?.. — Пилипӧй, эгӧ жӧ на тай орӧдчӧй-а, вай жӧ ӧвсьылам вежсьӧмсьыд. Гашкӧ и збыль ласичаыд ӧбӧдитӧ да.
Пильӧ дӧзмӧмӧн муніс.
Сэсянь Васьӧлӧн чибӧыд эз кут пӧсявны, сёйны кутіс и, важ дорсьыс бура справитчис.
