КЫДЗИ ПАСЬКАЛӦ СЁЯН МИЯН ТУШАЫН

Пуктанныд кӧ морӧсаныд кинытӧ, кыланныд сьӧлӧмныдлысь типиктӧмсӧ. Кодар боканыд нӧ сьӧлӧмныд? Личкӧй чуньнаныд сой сӧннытӧ, лыддьӧй, кымынысь типиктӧ сійӧ быд минутын? Позьӧ тӧдмавны типиктӧмсӧ пель дінӧ ки пуктӧмӧн. Лыддьӧй типиктӧмсӧ пукалӧм бӧрын да котралӧм либӧ уджалӧм бӧрын. Кор тэрыбджыка, унджыкысь типиктӧ?

Топалігӧн сьӧлӧм вирсӧ вир сӧнъясӧд йӧткыштӧ, паськалігӧн кыскӧ выль сикас вир сӧнъясӧд. Сьӧлӧм топавлігӧн вир разавлӧ став яй кузя. Тушаӧд кытшовтӧм бӧрын воӧ бӧр сьӧлӧмӧ.

Мортлӧн сьӧлӧм торъялӧ кык пельӧ: шуйгавывса да веськыдвывса джынъясӧ. Тыысь босьтӧм шоммӧдан газӧн вир воӧ шуйгавывса сьӧлӧм джынъяс, сэсянь мунӧ вир сӧнъясӧд яйӧ. Сӧнъясӧд мунігмозыс вир босьтӧ аслыс пӧткӧдан ваяс сюв рушку кучикысь. Вӧсньыдик сӧнъясӧд мунігӧн вир колялӧ яй пасьтала пӧткӧдан ваяссӧ да шоммӧдан газсӧ. Яйысь вир чукӧртӧ ковтӧм газсӧ, сійӧн пемдыштӧ. Пемдӧм вирыд бӧр локтӧ сьӧлӧмӧ веськыдвыв джынъяс, сэсянь мунӧ тыӧ. Тыын коляс шома газ, босьтас шоммӧдан газ, мунӧ шуйга сьӧлӧм джынйӧ, сэсянь бара паськалӧ став яйӧд.