СӦСТӦМА ВИДЗ АССЬЫД КУЧИКТӦ

Кучик видзӧ тэнӧ кӧдзыдысь, пӧсьысь, мукӧдторъясысь. Кучикӧн тӧдан (кылан) быд инмӧдчӧм: чуткӧм, вундысьӧм, доймӧм, малыштӧм. Кучикын петӧ уна вӧсньыдик гӧн, ловгӧн. Ловгӧн кызджык помнас сулалӧ ичӧтик гуранын. Мукӧд местаас ловгӧн быдмӧ ёнджыка, тшӧкыдджыка; мукӧдас омӧля, шоча. Мукӧд мортлӧн став тушаыс тырӧма ловгӧннас, зверъяслӧн моз. Ки-кок пыдӧсъясын ловгӧн оз пет.

Ассьыным кучикнымӧс кӧ видзӧдлам ыдждӧдан (гырсьӧдан) стеклӧ пыр, аддзам зэв ичӧтик розьяс. Сійӧ розьясӧд пыр петӧ пӧсь да гос. Пӧсь — яйлы ковтӧм ва, торъялӧ вирсьыд кучик увті зэв вӧсньыд сӧнъясӧд мунігӧн. Гос артмӧ кучик пиын жӧ. Гос да пӧсь петан розьясыс кӧ няйтчас, тупкысясны, госыс да пӧсьыс оз понды вермыны петнысӧ, кучикыд чутӧссяс, угриӧссяс, висьмас. Кор ми огӧ ёна уджалӧ, кучик пыр пӧсь петӧ суткиӧн 800 гр. Ёна уджалігӧн, пӧсьӧдчигӧн, петӧ унджык.

Колӧ кучиктӧ видзны пыр зэв сӧстӧма, сэки мортлы овны кокниджык, сӧвмӧ ӧдйӧнджык, лоӧ ойӧса, ён, оз кут висьны. Чужӧм кучик серти век тӧдам, висьӧ али оз мортыс: сійӧ быттьӧкӧ миян яйлӧн рӧмпӧштан. Кучиктӧ сӧстӧма видзны колӧмсӧ петкӧдлӧ со мый: вӧлі бритӧмаӧсь кроликӧс да куш кучик вывсӧ мавтӧмаӧсь лакӧн. Лакыд пырис пӧсь да гос петан розьясас, тыртіс, тупкис став розьсӧ кучиксьыс. Сідзнад кроликыд ёна висьмис, куим лун мысти куліс. Мортлӧн кӧ сотчас став кучик пасьтасьыс ⅔-ысь ыджыдджыка, морт кулӧ.

Медся ёна кучиктӧ колӧ видзны гыжйыштчӧмъясысь. Гыжйыштчӧм туйӧд вермасны яйӧдз да вирӧдз пырны синмӧн аддзытӧм посньыдик гагъяс, висьӧм новлӧдлысь бактерияяс.