ИСПИЩАЛЬ

Вӧчлывланныд ті испищальсӧ? Тулысын вундӧны вӧсньыдик пожӧм пу, сьӧвмӧссӧ дзуртӧны (перйӧны), мед лоӧ гыркса. Ӧтар помас топыда сюйӧны кӧтӧдӧм кудель тор, мӧд помӧдыс — бедьтор (бедь помсӧ кӧтӧдӧм кудельӧн гартӧны). Бедьсӧ кӧ ӧдйӧ сюян — шков! — лыяс испищальыд.

Мыйла нӧ лыйӧ?

Босьтӧй стеклӧ трубка сантиметр 20 кымын кузя. Вӧчӧй бедьтор сантиметр кузя кымын, мед стеклӧ трубка пытшкас кокньыда тӧрӧ.

Вундалӧй кын картупель сантиметрӧн‐джынйӧн кыза чӧланъясӧ. Ӧти чӧлан пуктӧй пызан вылӧ, стеклӧ трубканад личкӧй картупельсӧ вундымӧныс. Трубкаад лоӧ картупель пробка.

Трубкаыдлысь мӧдар помсӧ сідз жӧ тупкӧй картупель пробканад. Ӧти пробкасӧ чуньнад кутӧй. Мӧдсӧ бедьторнад сюйӧй трубка шӧрсьыс пыдӧджык, сэсся бедьторсӧ зэв ӧдйӧ бӧр кыскӧй. Видзӧдӧй, мый лоӧ пробкаыскӧд.

Висьталӧй, мый лои сынӧдыскӧд пробкасӧ сюйигӧн? Мый сынӧдыс керис пробканас бедьтор перйӧм бӧрын? Мый ті тӧдінныд сынӧд йылысь?

Мый кылӧ испищальысь лыйигӧн? Мыйла?