КЫДЗИ ПЕРЙЫНЫ ШОМА ГАЗ

І. Вӧчӧй гортын татшӧм тӧдмалӧм.

1. Босьтӧй стӧкан, пуктӧй пыдӧсас кымынкӧ тор мел. Кисьтӧй сэтчӧ этшаник уксус. Видзӧдӧй, мый кутас лоны.

2. Сутуга помӧ чуткӧй сись пом да ӧзтӧй, сэсся сюйӧй сійӧ жӧ стӧканӧ. Мый лоӧ?

3. Ӧзтӧй сись пом да лэдзӧй тыртӧм стӧканӧ. Кутас оз сотчыны сэні сиськыд?

ІІ. Классын вӧчам бурджык тӧдмалӧмъяс.

Босьтам паськыд сулея, гылӧдам пыдӧсас мел торъяс, кисьтам джынйӧдзыс кутшӧмкӧ кислота. Мый кутас лоны сулеяын?

Пробкаӧ сюям кусыньтӧм стеклӧ трубка. Пробканас тупкам сійӧ сулеясӧ. Мый кутас лоны мелсьыс петысь газыскӧд?

Стеклӧ трубкаыдлысь помсӧ сюям мӧд сулеяӧ. Аддзанныд онӧ мыйкӧ сэтысь?

Лэдзам сійӧ сулеяас сотчан сись пом либӧ сартаса би. Пондас оз сотчыны биыс?

Мый кутанныд тӧдны тадзи тӧдмалӧмнас? Мыйӧн торъялӧ сынӧдыд мелысь петӧм газсьыс?

Тайӧ газсӧ шуам шома газӧн.

ІІІ. Шома газыд сьӧкыдджык сынӧдысь.

Босьтам стӧкан, пыдӧсас сувтӧдам биа сись пом. Сэсся босьтам шома газ тыра мӧд стӧкан, пӧрӧдам сійӧс сись пома стӧкан вылӧ ва кисьтігмоз. Мый сэки лоӧ биыскӧд? Мый та серти кутам тӧдны?

ІV. Мыйяс ӧні тӧдам шома газ йылысь.

1. Шома газ сьӧкыдджык сынӧдысь.

2. Шома газын кусӧ би.

3. Лэдзам кӧ шома газ известка ва пыр, ваыс гудыртчас: ва пытшкын сывлӧм известкаыс пӧрӧ известнякӧ (известнякыс ваын оз нин вермы сывны).