СЬӦКЫД СЫНӦД
Ӧтик грездын нывбаба петіс ӧшинь улас юкмӧс^Струба./^ вала. Лэптіс васӧ, да тыра ведраыс мыніс кисьыс, кучкысис юкмӧс струбъяс, гезйыс ори. Баба пырис керкаас, тшӧктіс айкасӧ отсавны сылы ва ведрасӧ лэптыны.
Айкаыс кӧрталіс гез помӧ бедь, баба пуксис бедь вылас, кутчысис гезйӧ, кутіс лэччыны юкмӧсӧ. Айкаыс сійӧс лэдзӧ. Юкмӧслӧн вӧлі джудждаыс ставыс нёль метр, ваыс сӧмын 70 сантиметр судта.
Айка друг казяліс — гез личалі, горӧдіс бабалы. Баба эз шыась. Видзӧдліс юкмӧсӧ — баба ваын улӧ юрӧн куйлӧ. Старик повзис, пондіс горзӧмӧн йӧзӧс чуксавны. Мужикъяс да бабаяс унаӧн котӧртісны юкмӧс дорӧ. Ӧтик том морт, Иван, локтіс йӧз пытшсьыд юкмӧс дорӧ, босьтіс гез, пуксис бедь вылӧ, вӧньнас кӧрталіс асьсӧ гезъяс, тшӧктіс лэдзны юкмӧсӧ. Кыкӧн лэдзисны сійӧс, мукӧдыс видзӧдісны мый лоӧ Иванкӧд. Мыйӧн кутіс воны ва вежӧсӧдзыс, сылӧн киыс гезсьыд мыні, ачыс эськӧ уси ваас, эз кӧ кут кӧртӧдыс. Ставыс горӧдісны: „Кыскӧ пӧ сійӧс юкмӧссьыс бӧр!“ Бӧр лэптігӧн зон Иван кулӧм морт кодь вӧлі, юрыс инмаліс юкмӧс струбъяс, ачыс ӧшаліс кӧртӧд вылас. Чужӧмыс лӧзӧдӧма. Ставыс чайтісны сійӧс куліг. Му вылӧ водтӧдӧм бӧрын, регыдик овмысьт, Иван сьӧкыда лолыштіс, ловзис.
Кӧсйисны эськӧ нӧшта лэччывны мукӧд, да ӧтик морт ӧлӧдіс: лэччыны пӧ оз позь, юкмӧсас сьӧкыд сынӧд да, сьӧкыд сынӧднас пӧ лолавныд он вермы. Сэки мужикъяс котӧртлісны багыръясла да лэптісны бабаӧс. Баба кулӧма нин вӧлі. Юкмӧссӧ видлалігӧн казялісны, збыльысь юкмӧс пыдӧсас вӧлӧма сьӧкыд сынӧд.
Татшӧм сьӧкыд сынӧднас морт ни некутшӧм ловъя лов овны оз вермы. Лэдзисны юкмӧсӧ каньӧс. Мыйӧн сійӧ воис ва вежӧсӧ, пырысь-пыр кулі. Ловъя лолыд эськӧ оз нин вермы сэні овныд да, весиг би сэні оз сотчы. Ӧзъялан сись мыйӧн воис сьӧкыд сынӧдӧдз, пыр и кусі.
Сьӧкыд сынӧд чукӧрман местаяс овлӧны му пытшкын. Веськалан кӧ сэтшӧминӧ, пыр и кулан.
Кытысь нӧ лоӧ сьӧкыд сынӧдыс? Сійӧ лоӧ бур сынӧдысь жӧ, кодӧн ми пыр лолалам. Чукӧртам кӧ ӧтик инӧ уна йӧзӧс, пӧдлавлам ӧдзӧсъяссӧ да ӧшиньяссӧ мед оз пыр бур, сӧстӧм сынӧдыс, сэки сынӧдыс лоӧ юкмӧсад кодь омӧль, йӧзыс куласны.
Керкапытшса сынӧднытӧ частӧджык тӧлӧдӧй: гожӧмын ӧшиньястӧ восьса видзӧй, тӧлын пач трубасьыд бокӧвӧйсӧ восьтылӧй.
