МЫЙ СЕТІС ОКТЯБРСА РЕВОЛЮЦИЯ РАБОЧӦЙЯСЛЫ ДА КРЕСТЬЯНАЛЫ

1. Октябрса революция бырӧдіс помещикъяслысь да капиталистъяслысь власьт. Став власьтыс лои рабочӧй да крестьяна киын. Рабочӧйяс да крестьяна государствонас веськӧдлӧны рабочӧй, крестьяна да гӧрд армия депутат сӧветъяс пыр. Депутатъяссӧ сӧветас бӧрйыны вермӧны сӧмын уджалысьяс. Йӧз трудӧн олысьяслы — кулакъяслы, купечьяслы, попъяслы, заводчикъяслы, сідз водзӧ, бӧрйысигӧн гӧлӧс оз сетчы, сійӧн налӧн миян государствоын некутшӧм власьт абу.

2. Октябрса революция мырддис капиталистъяслысь пабрикъяс, заводъяс, кӧрт туйяс, банкъяс, мукӧд сикас озырлун. Сійӧ ставыс лои уджалысьяслӧн, рабочӧйяслӧн да крестьяналӧн, эз ӧтка-ӧткалӧн, а ставныслӧн; сійӧн, озырлуннас, веськӧдлӧ рабочӧй-крестьяналӧн бӧрйӧм сӧвет власьт. Тайӧ став озырлуннас сӧвет власьт мырсьӧ бурмӧдны олӧмсӧ рабочӧйяслысь да крестьяналысь.

3. Октябрса революция мырддис видз-му сарлысь, дворяналысь, купечьяслысь, манастыръяслысь, попъяслысь, став озырлысь. Крестьяна мынісны помещик кабыр улысь. Видз-муыс лои став ССРС-лӧн — Сӧвет Социалистическӧй Республикаяс Союзлӧн, уджалысь крестьяналы пӧльзуйтчӧм вылӧ.

4. Октябрса революция кокньӧдіс рабочӧйлысь уджсӧ: лӧсьӧдіс войдӧр 8 часа уджалан лун, ӧні лӧсьӧдӧ 7 часаӧс нин; лэдзис удж доръян законъяс.

Сар правительство дырйи рабочӧйяс та йылысь и мӧвпыштныс эз вермывны.

5. Сарлӧн власьт крестьянаӧс да рабочӧйясӧс видзліс пемыдӧн. Октябрса революция восьтіс налы паськыд туй велӧдчӧмӧ, культураӧ.

6. Сарлӧн власьт дзескӧдліс, рочӧ пӧртліс мукӧд сёрниа йӧзӧс — тотараӧс, кыргызъясӧс, калмыкъясӧс, грузинъясӧс, удмуртъясӧс, комиясӧс, сідз водзӧ.

Октябрса революция мездіс найӧс, ӧні найӧ быдӧн асьныс ассьыныс олӧм дорӧны, ассьыныс культура кыпӧдӧны.

ССРС пасьтаса быдсяма сёрниа йӧз олӧны мырдӧнавтӧм Союзын, мӧда-мӧдкӧд зычиттӧг, мӧда-мӧдӧс отсалӧмӧн.