КОД ВӦСНА МИ ВОЮЙТІМ САР ДЫРЙИ

(Салдатлӧн висьт)

Вӧтлісны миянӧс немечкӧд косясьны. Косьыс вӧлі! Войбыд мӧда-мӧднымӧс лыйлам. Усьысьыс мыйтӧм вӧлі!

Енэжыс быттьӧ гӧрд биӧн пӧртмасьӧ. Пуляясыс сідз и дзижйӧдлӧны, снарадъясыс потласьӧны, быттьӧкӧ ӧтырышъя чардыштӧ; югнитлас, сяркнитлас, сэсся мусӧ пуркнитас, ставсӧ гуалас, коді сы шӧрӧ лӧсялас. Кузянад тай и сэні велалан пуля улад овны. Йӧжгылясям окопын быттьӧ шыръяс, немечьясыд и ми.

Ми сулалам самӧй сикт помын. Найӧ, немечьяс, мӧдар помас. Ми зэв ёна тшыгъялам, тойӧссим, тӧлысь-мӧдӧн нин улыс кӧлуй эгӧ вежлӧ.

Кысси ӧти войӧ окопысь. Матыстчи ӧти ӧшинь дорӧ — котш-котш чукӧстчи. Восьтіс меным керкасӧ томиник ичмонь, немка. Сювтчӧ, оз лысьт шыасьныс. Ме нянь кора, шонтысьны вӧзйыся. Лэдзис ӧд менӧ, жальыс петіс. Нянь сетіс, тшай примус вылӧ пузьӧдны пуктіс. Сёя, быдӧн черлыӧй ротшкӧдчӧ. Думайта: оз сюр сэтшӧм выныс, коді менӧ вермас татысь вӧтлыны, кӧзяйкаыс кындзи.

Друг ӧшиняс тар-тар. Ичмоньыд меным моз жӧ восьтіс. Видзӧда, австриеч керкаад пырис... Дзоргам мӧда-мӧдным вылӧ. Нянь кӧликӧй горшӧ тасасьліс... Ог тӧдӧ, мый керны. Ичмоньыд меным кодьӧс жӧ сетіс сылы кусӧк нянь. Пуксис австриечыд мекӧд орччӧн. Сёйӧ, меысь на горшаджык ньылалӧ. Ичмонь вайис миянлы тшай, кык чашка. Кутім юны, быттьӧ зэв тӧдса суседъяс. Сёйим-юим да ӧти шебрас улӧ водім узьны.

Асывнас бура прӧщайтчӧмӧн янсӧдчим, сӧмын мӧда-мӧднымлысь сёрнинымӧс огӧ гӧгӧрвоӧ-а.

Муна окопӧ, думайта: тӧдны эськӧ, кӧн слӧй вежӧсыс. Мыйӧс ми ӧткодь уджалысь йӧз мӧда-мӧднымӧс виалам. Дерт, тайӧ австриечсӧ миянӧс моз жӧ вӧтліс начальствоыс. Торйӧдісны гӧтырсьыс, челядьсьыс, чужан мусьыс. Мыйтӧм кӧнкӧ найӧ курыд синвасӧ кисьтӧны. Вийсьы сар вӧсна, озыръяс вӧсна, — кув!..