СЕЛЬСӦВЕТЪЯСЛЫ КОЛӦ ЛОНЫ УДЖ НУӦДЫСЬЯСӦН КОЛЛЕКТИВИЗАЦИЯ УДЖЫН

Гырысь воськолӧн паськалан коллективизация сувтӧдіс мог — сиктъясысь кулакъясӧс кыдзи классӧс дзикӧдз бырӧдны. Тайӧ ыджыд уджсӧ вӧчигӧн сельсӧветъяслы сюся да бура колӧ уджавны. Кулакъяс найӧс бырӧдны бурӧн оз сетчыны. Коллективизация паськалӧмкӧд чорзясны классӧвӧй косьяс. Кулакъяс быд ногӧн пондасны торкны социализм лӧсьӧдны. Уджалысь крестьяна ӧтувтчӧмъяс налы вывті мустӧм, пондасны зільны пазӧдавны котыртӧм колхозъяс. Кулакъяс быдсяма лёк юӧр сӧвет власьт йылысь лэдзӧны, шӧркоддьӧм крестьянаӧс зільӧны асланьыс кыскыны. Кулакъяслы олӧм дзугны отсасьӧны поп-дяк, сектантъяс, озыръяс дор кыскысьяс и.

Сельсӧвет водзын мог: ӧтувтны батракъясӧс, гӧль да шӧркоддьӧм крестьянаӧс да, да лючки веськӧдлыны кулаккӧд косясян уджын. Сельсӧветӧ колӧ бӧрйыны сэтшӧм йӧзӧс, кодъяс чорыда сулалӧны коллективизация дор, кодъяс сьӧлӧмсьыс тӧждысьӧны-пессьӧны бурмӧдны овмӧс да кокньӧдны олӧм батракъяслы, гӧль да шӧркоддьӧм крестьяналы да. А налӧн олӧмыс бурмас, кор найӧ мынасны кулак кабырысь, кор став му-видз уджалысьыс сиктын пондасны уджавны ӧтув, мӧда-мӧдлы отсасьӧмӧн, ӧтувъя уджалан кӧлуйӧн.

Сельсӧветъяслы колӧ тӧждысьны, мед колхозникъяс ӧтувтасны тшӧтш эмбурсӧ, скӧтсӧ, мед лӧсьӧдасны колхоз олӧм бурмӧдны юклытӧм капитал, мед колхозникъяс пӧвстын вӧлі бур дисциплина.