КОЛӦ КОСЯСЬНЫ ВЕЛӦДЧЫТӦМКӦД

Кӧсъям кӧ выльнога олӧм лӧсьӧдны, колӧ вежны и олысьяссӧ: олӧм лӧсьӧдысьяслысь колӧ югдӧдны вежӧрсӧ, велӧдны найӧс бӧрйысьны олӧмас, уджас. Лӧсьӧдам машинаяс, ковмасны на дінӧ уна миллион велӧдчӧм йӧз, кужысь машина гӧгӧрыс бергавны. Ӧні ССРС-ын 16 арӧссянь 40 арӧсӧдз 20 миллион гӧгӧр ньӧти велӧдчытӧм морт. Велӧдчытӧмъяскӧд социализм оз артмы. Сы вӧсна витвося план кыскӧ дзикӧдз бырӧдны велӧдчытӧм верстьӧ йӧз пӧвстысь. Карса велӧдчытӧм рабочӧйясӧс 50 арӧсӧдз ставсӧ шуӧма грамотнӧйӧ пӧртны. Грамотнӧй йӧзлы пыр позьӧ водзӧ велӧдчыны: сы вылӧ быдпӧлӧс курсъяс, рабочӧй университетъяс восьталӧны.

Вит во помасигкежлӧ миян лоӧ 75 сюрс инженер, 110 сюрс техник, 250 сюрс техник да рулевӧй тракторъяс бердӧ, уна дас сюрс агроном, уна сё сюрс квалифицированнӧй рабочӧй, с.в.

Некод тайӧяс уджтӧмӧсь оз лоны. Оз на кут тырмыны велӧдчӧм уджалысьыс.

Челядьӧс ставсӧ пондасны велӧдны дон босьттӧг. Ӧні 10 миллион челядь велӧдчӧны посни школаясын, а 1933 воын став челядьыс (8–11 арӧса) лоӧны школаясын, 17 миллион морт.

Ӧні школаясӧ став челядьыс оз на тӧрны, сы вӧсна найӧ оз велӧдчыны, либӧ мукӧдыслӧн паськӧм-кӧмкотыс абу, сы вӧсна велӧдтӧмӧсь кольӧны. Гӧль челядьлы, батрак челядьлы да велӧдчыны лоӧ отсӧг. Дон босьттӧг налы сетасны нигаяс, тетрадьяс, карандашъяс; кодсюрӧлы паськӧм, кӧмкот. 1933ʼ воын сідзи отсавны шуӧма 617.000 школьниклы.

Ёна отсаласны велӧдчытӧмкӧд косясьны кино да радио. Нёль во мысти ССРС-ын лоӧ 35 сюрс кино, ӧні сӧмын 8.500. 14 сюрс кино лоӧ школаясын.

Ёна паськалас и радио. Сиктъясын быд дас керка вылӧ пондас воны ӧти радиоӧн. Громкоговорительяс сувтӧдаласны.

Нӧшта сӧветскӧй инженер Тагер лӧсьӧдӧма сёрнитысь кино: картинавывса мортыс ловъя морт моз сёрнитӧ. Сійӧ зэв нин буртор. Медпемыд, вӧрӧ вошӧм сиктса йӧз ас пельнас пондасны кывзыны на водзын сулалысь велӧдчӧм мортлысь сёрнисӧ, велӧдӧмсӧ, артистъяслысь ворсӧмсӧ, сьылӧмсӧ.