КЫДЗИ ЯРАНЪЯС ВӦЧӦНЫ ЧУМНЫСӦ

Яранъяс олӧны чумын. Сійӧс вӧчӧны ёсь йыла чом кодьӧс. Кытшӧн сувтӧдалӧны кузь шадзьяс, ӧтар помсӧ сутшйӧдлӧны муас, мӧдар помсӧ ставыслысь ӧтлаалӧны да кӧрталӧны. Чум вылісӧ гожӧмын вевттьӧны сюмӧд кискаӧн, тӧлын — кык пӧвста кӧр куясӧн. Му бердтіыс мудйӧны да нитшалӧны, а тӧлын лымйӧн тыртӧны, мед шоныдджык вӧлі. Чумыслысь ёсь помсӧ кольӧны восьсаӧн, тшыныслы петны. Ӧти бокті лӧсьӧдӧны ветланін. Ыдждаыс чумъяслӧн овлӧ уна пӧлӧс. Унджыкысьсӧ сувтӧдӧны 20–25 шадз, озыръяслӧн и 40–50 шадз. Бур тӧвся чумыд сулалӧ вель дона.

Чумыдлӧн пытшкӧсыс зэв жӧ прӧстӧй, ортсыыс кодь. Джоджас пукталӧны кыдз ньӧръяс (ульсалӧмысь), ньӧръяс вылас вольсалӧны кӧр куяс. Чум шӧрас пуктӧны кӧрт лист, сы вылын пестӧны би. Би весьтас ӧшалӧны пӧртъяс: пуӧны сёян. Ломтӧны бадь куст ньӧръясӧн. Сэтшӧм пескыд шонтӧм дорсьыс ёнджыка тшынӧдӧ. Пырыштас выліӧдыс тӧв — чумыс тырӧ тшынӧн, весиг лолыштныд велавтӧм мортыд он вермы, синтӧ сёйӧ, нинӧм он аддзы. Тшынысла яранъясыдлӧн унаысь синныс висьлывлӧ.