ЯРАНЪЯСЛӦН ОЛӦМ

Кӧртӧ видзӧмыд да кыйсьӧмыд яранъясӧс тшӧктӧ местаысь местаӧ ветлӧмӧн овны. Кӧръясӧс йӧршитӧмӧн видзны оз позь, найӧс колӧ лэдзны корсьны аслыныс сёяннысӧ — яла. Сы понда кӧр видзысьяслы лоӧ ветлыны кӧръясыскӧд местаысь местаӧ. Кыйсьӧмыд да чери кыйӧмыд вермас лоны сӧмын жӧ местаысь местаӧ ветлӧмӧн.

Тӧвнас яранъяс локтӧны вӧрӧ, пескаинӧ. Октябрсянь декабрӧдз кыйсьӧны посни зверъяс вылӧ, тулысланьыс кыйсьӧны гырысь зверъяс вылӧ. Кыйсиганыс нывбабаясыс да челядьныс кольччӧны чумъясаныс, кӧръяс дорас, яла быртӧдз олӧны ӧти местаын, сэсся бара ялааин корсьӧны. Гожӧмнас став семьяыс кӧръяснас мунӧ тундраӧ, Вой саридзланьӧ. Гожся тӧлысьясын яранъяс кыйӧны чери.

Мужикъясыс медсясӧ сёян перйӧм вылын и олӧны: зверъясӧс кыйӧны да чери кыйӧны, кыйсян кӧлуйсӧ лӧсьӧдӧны да. Нывбабаяс горт гӧгӧр удж вӧчӧны. Гожӧмнас найӧ кыйӧм черисӧ вӧчӧны да тӧв кежлӧ косьтӧны, вотчӧны, кӧръяссӧ ывдӧстчӧмысь видзӧны. Тӧвнас, мужикъяс кыйсигас, нывбабаяс кольччӧны челядьныскӧд чуманыс, кӧръяссӧ видзӧны, кӧр кусӧ вӧчӧны да вурӧны паськӧм.