ТУНДРА

Печӧралӧн войвывладорыс Вой саридзӧдз шусьӧ тундраӧн. Тундраыс — васӧд места, вӧртӧм. Кӧдзыдысла муыс сӧмын неуна сылыштлӧ, пыдітіджык — пыр кын.

Тундраын яранъяс да изьваса видзӧны кӧръясӧс. Став кӧрыс 400.000 кымын.

Кӧр видзысьясӧс кӧрыс вердӧ и пасьтӧдӧ: кӧр яйсӧ сёйӧны, кусьыс вӧчӧны паськӧм (паркаяс, маличаяс, пеля шапкаяс, пимияс). Том кӧр куясысь заводъясын вӧчӧны замша да вузавлӧны заграницаӧ. Весиг оланінсӧ, чомсӧ, вӧчӧны кӧр куысь. Ветлӧдлӧны кӧрӧн жӧ, доддяласны векньыдик доддьӧ да.

Мукӧд воас зэв уна кӧр усьлӧ вуджан висьӧмъясысь: 1924 воын уси 20.000 кымын. Медым кӧръяссӧ видзны вуджан висьӧмсьыс, ӧні найӧс пистиалӧны. Пистиалӧм кӧрыс оз висьмы.