ОЗ КОВ ЛЁК НОГӦН БЫРӦДНЫ ЗВЕРЪЯСӦС

Звер кыйӧмысь крестьяналы воӧ ыджыд доход. Коми обласьтувса кыйсьысьяс вузавлісны ассьыныс прӧмысъяссӧ:

1922–23 воӧ	708.600 шайт дон
1923–24 ”	1.285.270 „ „
1924–25 ”	1.012.000 „ „
1925–26 ”	744.900 „ „
1926–27 ”	880.000 „ „
1927–28 ”	1.682.000 „ „

Тайӧ лыдпасъяс сертиыс тыдалӧ, звер кыйӧмыд абу быд во ӧтмында. Мукӧд воас зверыс унджык, мукӧдас — этшаджык, сійӧн и звер кыйӧмыс воысь воӧ шыблӧдлӧ.

Ӧні звер куяс вылӧ доныс ёна кыптіс. Сы понда ёнджыка пондісны кыйсьыны. Войнаӧдз вӧлі урлӧн доныс 30–35 ур, а ӧні — ӧти шайт да комын ур.

Кыйсьысьяс, унджык нажӧтка босьтӧм понда, кыдзсюрӧ жугӧдӧны зверӧс. Найӧ чайтӧны зверъястӧ помтӧмӧн да, мӧда-мӧд вежмӧныс кыйӧны кор окота, зільӧны виавны асланыс кыйсянінсьыс ставсӧ, мед эськӧ оз нин ньӧти коль. Тулысын урӧс лыйлӧны тыра дырйиыс. Оз думайтны, мый быд инь ур, виан кӧ сійӧс тулысын, сетӧ убытка кыйсьысьяслы жӧ сё шайтысь унджык. Ӧти гоз урысь быд воӧн котыртчӧ сё урӧдз.

Кӧч кыйӧм лёк ногӧн жӧ мунӧ: гожӧмбыд кыясны пекляӧн. Сэтшӧм кӧчлысь кусӧ некытчӧ оз босьтны.

Звер кыян удж бурмӧдӧмӧ колӧ чорыда босьтчыны да некутшӧма оз ков лэдзны кыйсьыны позьтӧм кадъясӧ, кор правительство оз тшӧкты. Мукӧд кӧ оз кутны кывзыны, на йылысь колӧ висьтавны исполкомӧ либӧ милициялы. Огӧ кӧ кутӧй тайӧ лёкъяснас вермасьны, сэки воысь воӧ прӧмыс кутас чинны.