ВӦР ПРАЗДНИК ЛУН

(Быдлунся пасъялӧмысь)

1925 вося май 17ʼ лунӧ миян Помӧсдін грездын вӧлі вӧр праздник лун. Вежон чӧж сійӧ лунӧдзыс ми школаын велӧдчим пыр вӧр йылысь да пуяс йылысь. Ветлӧдлім вӧръясӧд, тӧдмалім, кӧні кыдзи быдмӧ вӧр пуыс, кутшӧм арлыдаӧсь пуясыс; тӧдмалім ещӧ, мый вӧрас быдмӧ, мый оз; кутшӧм пӧткаяс да гагъяс вӧр пулы бур вӧчӧны, кутшӧмъяс лёк... унатор...

Классын пукалігӧн пыр лыддьысим, арталім, гижим да рисуйтчим бара жӧ вӧр пу йылысь, вӧрса пӧтка-звер йылысь, гагъяс йылысь да. Сійӧ арталӧмъяс да мӧвпалӧмъяс сертиыс ми аддзим зэв уна буртор мый сетӧ вӧрыд мортлы, торъя нин миянлы, коми йӧзлы. Сійӧ бурторъяссӧ ми ӧтлаалім, тэчим да гижим дорвыв.

Со миян мый лои.

1. Ӧти-кӧ — вӧр пуысь ми вӧчам аслыным познымӧс (керка-карта).

2. Мӧд-кӧ — шоныд перъям вӧр-пу помысь жӧ (пес).

3. Дозмук, кутшӧм миян эм, пӧшти (нымӧн) ставыс пуысь вӧчӧма.

4. Вӧр сетӧ миянлы (Коми обласьт казналы) ыджыд нажӧтка вузалӧмсьыс да кер дорын уджалӧмсьыс (пӧрӧдӧм, лэдзӧм, кылӧдӧм. Уна-ӧ?)

5. Вӧр сетӧ миянлы прӧмыс (кыйӧм-виӧм) вузӧс вылӧ дай аслыным сёйӧм вылӧ тшӧтш. (Мый дон прӧмыссӧ кыйлӧны?)

6. Вӧр пу видзӧ юяс косьмӧмысь, гожӧмын мусӧ ёна косьтӧмысь.

7. Вӧр пу видзӧ лымйӧн да лыаӧн тыртӧмысь, кӧдзыд вой тӧв кутӧ, кос тӧв гожӧмын ульсӧдӧ.

8. Вӧр пу ас лолалӧмнас сынӧдсӧ (воздухсӧ) весалӧ (сӧстӧммӧдӧ), миянлы бур сынӧд лолавны вӧчӧ.