МЫЙЛА КОЛӦ НЮР КОСЬТЫНЫ

Миян Коми обласьтын муясыд нянь вайӧны куйӧдӧн вынсьӧдӧм серти. Мед муыд бура ваяс няньтӧ, ӧти гектар муӧ быд кык либӧ куим урожай вылӧ колӧ сюйны куйӧдтӧ 38,4 тонна кымын. Та мында куйӧдыс ӧти воӧн вермас лоны сӧмын 4–5 мӧслӧн. Нёль мӧс видзӧм вылӧ колӧ 8 тонна турун. Лыддям кӧ быд гектар виддзысь тоннаӧн-джынйӧн турун, ковмас 5 гектар дорысь унджык видз.

Та серти ми аддзам: мед му вылӧ лоӧ куйӧдыд тырмиг, колӧ видзны тырмымӧн скӧт. Скӧт видзны ми вермам видзьяс серти. Крестьяналӧн видзьясыд миян обласьтын этшаӧсь. Уна скӧт видзны оз вермыны. Кӧдзӧм турун вӧдитӧны омӧля на. Ньӧбӧм куйӧдӧн муяс пӧшти некод оз бурмӧд. Му вылӧ куйӧд оз тырмы. Сы вӧсна няньяс воӧны омӧля. Видзьяс паськӧдны бур местаяс сиктъяссянь матігӧгӧрын абуӧсь: бурджык местаяссӧ быдӧн нин вӧчалӧма виддзӧ. Колялӧма сӧмын матігӧгӧрын лёк местаяс (нюръяс да васӧдінъяс). Сэтшӧм местаяссӧ крестьяна лыддьӧны шогмытӧм местаясӧн.

Мед эськӧ не мунны видзьясӧн паськӧдчыны сиктсянь ылӧ да сійӧн бырӧдны скӧтлы турун тырмытӧм, колӧ чорыда босьтчыны сиктъяссянь матігӧгӧрса нюръяс либӧ васӧдінъяс косьтыны да бурмӧдны.

Ӧткӧн либӧ кыкӧн сэтшӧм уджтӧ вӧчны, дерт, он вермы. Колӧ нюртӧ косьтӧм вылӧ босьтчыны уналы ӧтвылысь, нюр косьтан (мелиоративное) товариществоӧ ӧтувтчӧмӧн.

Коми обласьтын быд 100 гектар вылӧ воӧ:

Гӧрӧм му .... 0,07 гектар

Видз .... 0,29 „

Вӧр .... 59,08 „

Шогмытӧм му (нюръяс, васӧдінъяс, тундра) .... 40,46 „