ЧЕРИ БЫРӦМ ДА ЙЫВМӦДӦМ

— Важӧн мыйтӧм чериыд вӧлі! — шуасны пӧрысь йӧз. — А ӧні?

— Ӧні весиг чери кӧрсӧ он кывлы.

— Водзын вӧлі тывйыштан да кыскыныд он вермы, а ӧні тывйыд куш локтас.

— Кытчӧ нӧ мый чериыс лои? — шензьӧны мукӧд. — Воысь воӧ ӧтарӧ чинӧ. Гашкӧ, дзикӧдз сэсся бырӧ да?!.

— Бырӧ бара, он кӧ куж пӧльзуйтчыныд. Сідз жӧ бырӧ, кыдз тай бырӧмаӧсь кутшӧмсюрӧ пемӧсъяс му вывсьыс, морт бырӧдӧмӧн.

Коркӧ со Коми муын вӧлӧмаӧсь „мой“ зверъяс, ӧні абуӧсь нин, сӧмын тай мойдкывйысь кывлан: „мой лопта пелысӧн, вурд бӧж зібйӧн“. Либӧ йӧраяс, кӧнкӧ ӧтка-ӧтка сӧмын нин кольӧмаӧсь. Сідз жӧ и чериясыдкӧд вермас лоны, оз кӧ мортыд дугды лёк ногӧн кыйсьӧмысь.

— Кыдзи лёк ногӧн?

— Сідзи: ӧти-кӧ, мед посни черисӧ оз кыйны (мед эз вӧвны ёс кӧвтан кӧвтымъяс, посни чери тывъялан тывъяс), мӧд-кӧ: кыйсьыны пӧра вылын (чери кульмигӧн не кыйны); сэсся: кутшӧмкӧ юясысь да тыясысь дзикӧдз дугдывны мыйкӧдыра кежӧ черисӧ кыйӧмысь, мед сэні чериыс йывмас; дзикӧдз дугӧдны чери виан ядъясӧн кыйӧмысь; дугӧдны чериа тыяс косьтӧмысь, ю вомӧн ез потшӧмысь. Да уна ногӧн на позьӧ черитӧ бырӧмысь сувтӧдны.

___________

Кутшӧм сикас черияс тіянладорын эмӧсь? Кутшӧм чери медуна? Кутшӧм медэтша? Кыдзи кыйсьӧны тіянладорын: кутшӧм пӧлӧс кыйдӧсъясӧн? Кымын чери кыйысь морт тіян сиктын? Вузавмӧн али аслыныс сёймӧн сӧмын кыйӧны? Кутшӧм местаын Коми обласьтын медъёна черисӧ (бокӧ вузавмӧн) кыйлӧны? Уна-ӧ? Корсьлӧй сы йылысь гижӧдъяс газетъясысь да журналъясысь.

Кутшӧм чери миянӧ бокысь вайӧны? Уна-ӧ?

Кужам кӧ эськӧ ми вӧлі черинад пӧльзуйтчыныд, эз ковмы сійӧс миянлы бокысь ньӧбны. Черилӧн медыджыд враг — морт.