МЫЙ ВЫЛӦ БУР ШАБДІ

Бура небзьӧдӧм му вылӧ кӧдзисны шабді. Дэбыд зэрӧн сійӧс киськаліс, шоныд гожйӧн пӧжис, да и быдмис шабді шензьымӧн кузя. Чветитӧ кельыд лӧз чветӧн. Гоннялӧны чветъясыс, а подулас шабді юрыс йӧрыштчӧ, кӧйдысыс воӧдчӧ.

Нетшкисны шабді вужнас, вӧнявлісны да тыӧдісны, вӧйтісны бутвидзан тыӧ.

Лэптісны тыысь. О, кутшӧма небзьӧма, сыркмунӧма. Вольсавлӧмӧн бара на тыӧдыштісны, сэсся куралісны да потшӧсъясӧ косьтыны ӧшлісны.

Няръялісны гумладорын, ниралісны сарайын, зуалісны шоныд пывсянын да печкисны тӧвся рытъясӧ паччӧр дорын.

Шӧртсӧ пансян вылӧ панісны, свӧлӧкӧ быдмалісны да и станӧ лӧсьӧдісны.

Зят-зят — тулысбыд кылӧ быд керкаын. Со и кыисны кузь шабді дӧра. Сійӧс бара кӧтӧдлӧмӧн, нӧшалӧмӧн, вольсавлӧмӧн белитісны. Лоис зэв мича, еджыд быг кодь шабді дӧра.

Мамӧ сійӧс шӧравліс да миянлы дӧрӧм-гачьяс вураліс.

Дырӧн дӧрӧм-гачыд киссисны, колисны сӧмын наысь ротъясыс. Ротъястӧ рот ньӧбысьлы вузалісны чукӧрнас.

Сійӧ нуӧма найӧс фабрикаӧ. Сэні рабочӧйяс ротъястӧ шырисны да рок кодьӧдз гырысь пӧртъясын пуӧдісны. Разӧдісны вӧсньыдика пызан кодь вылӧ, сэсся машинаясӧн керӧмӧн сійӧ рок кодьсьыд артмис зэв мича еджыд бумага.

Фабрикаысь бумагасӧ нуисны нига лэдзанінӧ, сэтчӧ стихъяс, висьтъяс да мукӧдтор печатайтісны.

Лои шабдісьыд нига.

Ӧні коми нигаысь ми лыддям, мыйяс керисны шабдіысь, велӧдам, кыдзи сійӧс кӧдзӧмсяньыс да нигаӧ лотӧдз уджалӧны.