КЫДЗИ БОСЬТНЫ ПӦЛЬЗА ТУРУНТӦМ ВИДЗЬЯСЫСЬ

(Крестьянинлӧн висьт)

Кӧдзан муяс медкокниа да ӧдйӧ позьӧ лӧсьӧдны турунтӧм видзьяс вылӧ. Сэтшӧм видзьясыс Коми обласьтад эмӧсь бура уна. Мусин татшӧм местаясас эськӧ и бур, да турунсӧ омӧля вайӧ ёна топалӧм да нитшсялӧм вӧснаыс. Гектар пасьта местаысь воӧ сӧмын додь-кык турун. Татшӧм видзьяс вылас и колӧ лӧсьӧдны муястӧ.

Гӧрны колӧ арын да лажмыдика: 10–12 кымын сантиметр пыдна. Тӧвся кыныс арся гӧрӧм местасӧ небзьӧдас. Тулыснас, пинёвтӧм бӧрын, позьӧ кӧдзны гӧрӧм местаас шабді. Выль местаад шабдіыд артмӧ бура: быдмӧ кузя да и ёгыс оз кай. Гектар пасьта местаысь шӧркоддьӧм мында воас 600 кг кымын шабді. Сійӧ сулалӧ 300 шайт гӧгӧр. Да нӧшта шабді кӧйдыс воас 600 кг. Тайӧ сулалӧ 76 шайт. Сідзкӧ, шабді сетас доходсӧ 376 шайт дон кымын. А гӧртӧдзыс уна-уна нин туруныд быдмас 12–20 шайт дон.

Мӧд вонас тайӧ местаӧ позьӧ кӧдзны ид, зӧр, вика либӧ анькытш. Позьӧ пуктыны картупель. Сійӧ бура быдмас ньӧти куйӧдавтӧг. Та бӧрын колӧ нин сэсся мутӧ куйӧдавны. Куйӧд дінӧ позьӧ содтыны тшӧтш пӧим либӧ мукӧд сикас мувынсьӧдантор. Сэсся сэтчӧ колӧ кӧдзны ид либӧ турун. Турун быдмас бура во нёль-вит. Первой вонас быдмас 11 додь кымын гектар вылӧ. Витӧд вонас чинас нин додь 5–6-ӧдз.

Та мында турун воліс меным гӧрӧм му вылысь (Айкинаын), эз жӧ вӧв таысь этшаыд и Проньдорса крестьяналӧн. Айкинаын да Проньдорын кӧ бур урожайяс гӧрӧм видз вылысь воӧны, Сыктыв да Кулӧмдін районъясад воасны жӧ.