МЫЙЛА КУЙӦД РУДАӦН МУЯС ВЫНМӦНЫ

Воысь воӧ ми кӧдзам муяс вылӧ нянь, куйӧдалам кык во мысти карта выв куйӧдӧн. Куйӧдыд сісьмигас сетӧ ваын сылысь совъяс. Сійӧ рӧсовсӧ кӧдза пуктас аслас вужъяснас нёнялӧ. Куйӧдын эмӧсь уна пӧлӧс совъяс, эм уна вещество (кӧлуй): кальций, калий, натрий, кӧрт да мукӧдтор. Натӧг кӧдза пуктасыд оз вермы быдмынысӧ.

Ми няньтӧ му вывсьыд босьтам да идзассӧ бӧр му вылӧ куйӧдӧн сюям. Кӧйдыссӧ (нянь тусьсӧ) ми асьным сёям. Кӧйдысас эм уна вещество, сы пиын тшӧтш фосфор шом. Фосфор шомыс унджыкысь мусьыд веськалӧ нянь кӧйдысӧ (нянь тусьӧ). Идзасын сійӧ зэв этша. Нянь тусьтӧ сёйӧмӧн миян вир-яй пытшкӧ и кольӧ сійӧ фосфор шомыд. Сідзкӧ, фосфор шом му вылӧ бӧр оз нин вермы веськавны, а пыр ӧтарӧ, воысь воӧ, важ запасыс сэтысь бырӧ. Турунысь фосфор шомыд кольӧ скӧтлы, бара жӧ оз во му вылӧ. Со мый вӧсна колӧ мусьыс бырӧм фосфор шомсӧ бӧр мулы сетны. Сетны сійӧс (фосфор шомсӧ) позьӧ руда куйӧдӧн.